Ռուսաստանի կողմից իրականացվող ավիահարվածները թույլ չեն տալիս «չափավոր ընդդիմությանը» տարանջատել ահաբեկիչներից. Ջոն Քերի
ԱՄՆ պետքարտուղար Ջոն Քերին հոկտեմբերի 31-ին Լոնդոնի միջազգային հարաբերությունների թագավորական ինստիտուտում ունեցած ելույթի ժամանակ հայտարարել է, որ իրենք կարող են «չափավոր ընդդիմությանը» ահաբեկիչներից տարանջատել միայն այն դեպքում, եթե Ռուսաստանը դադարեցնի ավիահարվածները: Այս մասին հայտնում է ռուսական РИА Новости լրատվական գործակալությունը:
Աղբյուրի համաձայն՝ Քերին նշել է, որ վերջին հինգ տարվա ընթացքում իրենց չի հաջողվել սիրիական հարցում իրական բանակցություններ անցկացնել, քանի որ «բոլորը, հյուրանոցի իրենց համարներում նստած, հեռվից վիճում են միմյանց հետ»:
«Այնուամենայնիվ, ես հույս ունեմ, որ մենք ինչ-որ արդյունքի կհասնենք մոտակա երկու ամսվա ընթացքում: Մեր աշխատակազմին մնացել է աշխատելու ընդամենը 2,5 ամիս, և ես պատրաստվում եմ մինչև վերջին օրը աշխատել այս ուղղությամբ», - ասել է պետքարտուղարը: Նա նաև նշել է, որ ԱՄՆ-ը գրեթե կորցրել է վստահությունը Ռուսաստանի նկատմամբ:
Նշենք, որ նախորդ շաբաթ ՌԴ Արտաքին գործերի նախարար Սերգեյ Լավովը հայտարարել էր, որ չեն արդարացել Ռուսաստանի այն հույսերը, որ հումանիտար դադարը ԱՄՆ-ը կօգտագործի Սիրիայում «չափավոր ընդդիմությանը» ահաբեկիչներից տարանջատելու համար: