Պեսկովը մեկնաբանել է Ռուսաստանի կողմից Հալեպում նախապատրաստվող լայնամասշտաբ գործողությունների մասին արևմտյան աղբյուրների տարածած լուրերը

ՌԴ նախագահի մամուլի խոսնակ Դմիտրի Պեսկովը հերքել է Times թերթի տարածած այն պնդումը, որ Ռուսաստանը պատրաստվում է լայնամասշտաբ գործողություն սկսել Հալեպում: Այս մասին հայտնում է ռուսական ТАСС լրատվական գործակալությունը:

«Դժվար թե Times թերթը Ռուսաստանի նախագահի պլանների մասին որևէ տեղեկատվություն ունենա», - ասել է Պեսկովը: Նա նաև հիշեցրել է, որ, երբ ՌԴ նախագահը որոշեց Հալեպում հումանիտար դադարը երկրացնել, Կրեմլում նշում էին, որ ամեն ինչ կախված է ահաբեկիչների դիրքորոշումից:

Դմիտրի Պեսկովը նշել է նաև, որ հիմա էլ հումանիտար դադարը շարունակվում է, և իրենք ապահովում են խաղաղ բնակչության տարհանումը Հալեպի արևելյան շրջաններից: «Ստեղծվում են հումանիտար օգնության պայմաններ: Այս ամենը, սակայն, հնարավոր չի լինի իրականացնել, եթե ահաբեկիչները մարդասիրական օգնություն հասցնող մեքենաների ուղղությամբ սկսեն կրակ բացել և շարունակեն խաղաղ բնակչությանն օգտագործել որպես վահան», - ավելացրել է նա: