Ռուսաստանը Հալեպում նոր «մարդասիրական դադար» կսահմանի

Ռուսաստանի Դաշնության պաշտպանության նախարար Սերգեյ Շոյգուի որոշմամբ՝ Հալեպում նոր «մարդասիրական դադար» կհայտարարվի: Նախատեսվում է, որ այն կգործի նոյեմբերի 4-ին՝ ժամը 09:00-ից մինչև 19:00-ն: Այս մասին հայտարարել է ՌԴ ԶՈՒ Գլխավոր շտաբի պետ Վալերի Գերասիմովը:

«Ամեն ինչ նախօրոք կազմակերպված կլինի: Հումանիտար միջանցքներ կգործեն ինչպես խաղաղ բնակչության, այնպես էլ՝ զինալների համար», - ասել է Գերասիմովը: Վերջինիս խոսքով՝ այս որոշումը համաձայնեցված է Սիրիայի ղեկավարության հետ:

Նշենք, որ Հալեպում «մարդասիրական դադար» գործել է նաև հոկտեմբերի 20-22-ը: Ռուս-սիրիական զորքերն այդ ժամանակ քաղաքը լքելու համար հումանիտար ութ միջանցք էին բացել, որոնցից 6-ը նախատեսված էր խաղաղ բնակչության, իսկ 2-ը՝ զինյալ ահաբեկիչների համար: Վերջիններս հրաժարվել էին լքել քաղաքը և սպառնում էին կրակ բացել խաղաղ բնակչության ուղղությամբ: