Դոնալդ Թրամփը պատրաստվում է դատական հայց ներկայացնել իր մասին վավերագրական ֆիլմ ստեղծողների դեմ
ԱՄՆ նախագահի հանրապետական թեկնածու Դոնալդ Թրամփը սպառնացել է դատական հայց ներկայացնել իր մասին վավերագրական ֆիլմ ստեղծողների դեմ: Այս մասին հայտնում է ամերիկյան CNN լրատվականը:
«Ոչ մի արտասովոր բան չկա: Թրամփն այդպես է ուզում վարվել, քանի որ ֆիլմն իրեն դուր չի եկել», - ասել է ֆիլմի շոտլանդացի ռեժիսոր Էնտոնի Բեքսթերը: Չնայած սպառնալիքներին՝ ռեժիսորը որոշել է ֆիլմն («You’ve Been Trumped Too») անվճար ցուցադրել facebook-ում:
Ռեժիսորի խոսքով՝ ֆիլմը պատմում է այն մասին, թե ինչ վնասներ են կրել Շոտլանդիայի Բալմիդի քաղաքի բնակիչները, երբ այստեղ Թրամփի համար գոլֆի դաշտ էին կառուցում: Մասնավորապես, ֆիլմում պատմվում է մի ընտանիքի մասին, որը շինարարության պատճառով զրկված էր անգամ ջրից: Բեքսթերը նշում է, որ նրանք հնարավորություն չեն ունեցել դիմել դատապաշտպանի:
Հեղինակը հույս է հայտնել, որ բազմաթիվ ամերիկացիներ կնայեն իր ֆիլմը: