Թուրքիայում ոստիկանությունը ձերբակալել է քրդական «Ժողովրդա-դեմոկրատական» կուսակցության (ԺԴԿ) համանախագահներին ու նույն կուսակցության ևս 9 պատգամավորի
Նոյեմբեր 3-ի լույս 4-ի գիշերը թուրքական ոստիկանությունը ձերբակալել է քրդամետ Ժողովուրդների դեմոկրատական կուսակցության (ԺԴԿ) համանախագահներ Սելահաթթին Դեմիրթաշին ու Ֆիգեն Յուքսեքդաղին, ինչպես նաև նույն կուսակցությունը ներկայացնող ևս 9 պատգամավորի (Անկարայից ընտրված Սըրրը Սյուրեյյա Օնդերին, Դիարբեքերից՝ Իդրիս Բալուքենին, Զիյա Փիրին, Նուրսել Այդողանին, Շըրնաքից՝ Լեյլա Բիրլիքին, Ֆերհաթ Էնջյուին, Սելմա Ըրմաքին, Հաքքարիից՝ Աբդուլլահ Զեյդանին, Մարդինից՝ Գյուլսեր Յըլդըրըմին): Այս մասին հաղորդում է թուրքական ընդդիմադիր «Ջումհուրիյեթ» պարբերականը:
«Անադոլու» գործակալության տեղեկություններով՝ ձերբակալությունները տեղի են ունեցել Թուրքիայում հուլիսի 15-ի հեղաշրջման ձախողված փորձին հաջորդած հակաահաբեկչական գործողության շրջանակներում: «Միլլիյեթ» թերթի հրապարակման մեջ բերված են շրջանառվող հիմնական մեղադրանքները, որոնց թվում են ահաբեկչական կառուցներին անդամակցելը, ահաբեկչության քարոզչությամբ զբաղվելը, Թուրք ազգը, Հանրապետությունն ու ԹԱՄԺ-ը նսեմացնելը և այլն:
«Հաբերթյուրք» լրատվական գործակալության փոխանցմամբ՝ Թուրքիայի ներքին գործերի նախարարությունը կատարված ոստիկանական գործողության վերաբերյալ համապատասխան հայտարարություն է տարածել, որում մասնավորապես նշվում է, որ ձերբակալությունները կատարվել են Դիարբեքիր, Շըրնաք, Հաքքարի, Վան և Բինգյոլ նահանգների դատախազությունների պահանջով:
«Թյուրքիյե» թերթի տեղեկատվության համաձայն՝ գործողությանը զուգընթաց՝ սկսած տեղական ժամանակով գիշերը 02:00-ից Թուրքիայի տարածքում չեն գործում «Facebook» «Whatsapp», «Twitter» և «Youtube» սոցիալական ցանցերը: ԺԴԿ համանախագահ Ս. Դեմիրթաշը, սակայն, հասցրել է թվիթերյան միկրոբլոգում տեղեկացնել իր մոտալուտ ձերբակալության մասին: «Դիարբեքիրում իմ տան դռան մոտ անվտանգության մարմինների աշխատակիցներն են՝ ձերբակալության վերաբերյալ համապատասխան որոշմամբ», - գրել է Դեմիրթաշը:
ԺԴԿ մեկ այլ պատգամավոր Էրթուղրուլ Քուրքչուն, ով այս պահին գտնվում է երկրից դուրս BBC-ին տված հարցազրույցում նշել է, որ ձերբակալությունները «լիովին անօրինական են»: Նրա խոսքերով՝ օրեր առաջ երկրի ամենահին աշխարհիկ թերթի՝ «Ջումհուրիյեթի» խմբագրությունում և այս գիշեր ԺԴԿ ղեկավարների տներում տեղի ունեցած ձերբակալությունները վկայում են այն մասին, որ «թուրքական կառավարությունը շարժվում է դեպի նացիստական մոդելի բռնապետություն»:
Թուրք և օտարերկրյա վերլուծաբանները նկատում են, որ տեղի ունեցածն, ամենայն հավանականությամբ, բռնության նոր ալիք կհարուցի երկրում: Դրա առաջին նշաններն արդեն իսկ ի հայտ են եկել. տեղական ժամանակով առավոտյան 08:00-ին պայթյուն է որոտացել Դիարբեքիրի Բաղլար շրջանի ահաբեկչության դեմ պայքարի վարչության շենքի տարածքում: