Պենտագոնը հայտարարել է ԱՄՆ-ի ավիահարվածների հետևանքով Սիրիայում և Իրաքում զոհված քաղաքացիական անձանց մասին
64 խաղաղ բնակիչ է զոհվել Իրաքում և Սիրիայում ԱՄՆ-ի ավիահարվածների հետևանքով: Այս մասին գրում է «Ռոյթերս» լրատվական գործակալությունը՝ հղում կատարելով ամերիկացի զինվորականների հայտարարությանը:
Աղբյուրի համաձայն՝ խոսքը 24 ավիահարվածի մասին է, որոնք հասցվել են 2015թ-ի նոյեմբերի 20-ից մինչև 2016թ-ի սեպտեմբերի 10-ը ընկած ժամանակահատվածում: Մասնավորապես՝ 2015թ-ի նոյեմբերի 20-ին Դեր Զորի շրջանում զոհվել է հինգ, իսկ մարտի 5-ին Մոսուլում՝ 10 խաղաղ բնակիչ: Ամերիկյան կողմի հավաստմամբ՝ դեպքերից յուրաքանչյուրի ժամանակ անհրաժեշտ միջոցառումներ են ձեռնարկվել խաղաղ բնակչության շրջանում զոհերից խուսափելու համար:
Ամերիկացի զինվորականներն ընդունել են, որ իրենց ավիահարվածների հետևանքով 2014թ-ից սկսած, ընդհանուր առմամբ, զոհվել է 119, իսկ վիրավորվել՝ 37 խաղաղ բնակիչ:
«Ամնեսթի ինթերնեյշնլ» իրավապաշտպան կազմակերպության տվյալներով՝ ԱՄՆ գլխավորած կոալիցիոն ուժերի կողմից հասցված ավիահարվածների հետևանքով Սիրիայում և Իրաքում զոհվել է մոտ 300 քաղաքացիական անձ: