Դոնալդ Թրամփը՝ ԱՄՆ 45-րդ նախագահ

Նոյեմբերի 8-ին կայացած ԱՄՆ նախագահական ընտրություններում հաղթանակ է տարել հանրապետական թեկնածու Դոնալդ Թրամփը՝ հավաքելով ընտրական կոլեգիայի անդամների 276 ձայն:

ԱՄՆ նախագահի ընտրությունների անցկացման կարգի համաձայն՝ քաղաքացիները թեկնածուի օգտին քվեարկելու ուղղակի հնարավորություն չունեն: Նրանք ընտրում են ընտրական կոլեագիայի անդամներին, վերջիններս էլ ուղղակի քվեարկությամբ ընտրում են նախագահին: ԱՄՆ նախագահ դառնալու համար անհրաժեշտ է ստանալ 538 անդամից ամենաքիչը 270-ի ձայները: Կախված նահագներից ընտրական կոլեգիայի անդամների թիվը տարբեր է:

Դոնալդ Թրամփը հաղթել է Մոնտանա, Այդահո, Յուտա, Վայոմինգ, Հյուսիսային Դակոտա, Հարավային Դակոտա, Նեբրասկա, Կանզաս, Օկլահոմա, Տեխաս, Վիսկոնսին, Միսսուրի, Արկանզաս, Լուիզիանա, Ինդիանա, Կենտուկի, Այովա, Թենեսի, Միսսիսիպի, Ալաբամա, Ֆլորիդա, Ջորջիա, Հյուսիսային Կարոլինա, Հարավային Կարոլինա, Փենսիլվանիա, Օհայո, Արևմտյան Վիրջինիա և Ալյասկա նահանգներում:

Թրամփը դարձավ ԱՄՆ 45-րդ նախագահը: Այս կապակցությամբ նա բազմաթիվ շնորհավորանքներ է ստացել աշխարհի տարբեր երկրների ղեկավարներից: ՌԴ նախագահ Վլադիմիր Պուտինն առաջիններից մեկն է շնորհավորել նրան: «Շնորհավում եմ Դոնալդ Թրամփին ԱՄՆ նախագահի ընտրություններում հաղթանակ տանելու կապակցությամբ: Մենք հետևել ենք քարոզարշավի ժամանակ Թրամփի ելույթներին, որտեղ նա խոսել է նաև ԱՄՆ-ի և Ռուսաստանի միջև լավ հարաբերություններ հաստատելու մասին: Հասկանում ենք, որ դա այնքան էլ հեշտ չի լինի: Բազմիցս նշել ենք, որ ԱՄՆ-ի հետ հարաբերությունների վատթարացումը մեր մեղքով չէ: Այնուամենայնիվ, մենք պատրաստ ենք և ցանկանում ենք վերականգնել ԱՄՆ-ի հետ հարաբերությունները», - իր շնորհավորական խոսքում ասել է Պուտինը:

Մեծ Բրիտանիայի վարչապետ Թերեզա Մեյը նույնպես շնորհավորել է Դոնալդ Թրամփին և հույս հայտնել, որ Միացյալ Նահագները և Մեծ Բրիտանիան կշարունակեն բարեկամական հարաբերությունները: «Շնորհավորում եմ Դոնալդ Թրամփին ԱՄՆ 45-րդ նախագահը դառնալու կապակցությամբ: Մեծ Բրիտանիան և ԱՄՆ-ը ազատության և ժողովրդավարության նույն արժեքների վրա հիմնված բարեկամ երկրներ են: Հույս ունեմ, որ Թրամփի հետ աշխատելու տարիներին նույնպես մենք կշարունակենք լինել դաշնակից երկրներ թե անվտանգության և թե առևտրի ոլորտներում», - ասել է Թերեզա Մեյը:

Ֆրանսիայի նախագահ Ֆրանսուա Օլանդն իր շնորհավորական խոսքում նշել է, որ Դոնալդ Թրամփի հաղթանակն անորոշության սկզիբ է դնում աշխարհում: