Իրաքում և Սիրիայում ԱՄՆ-ի ավիահարվածների հետևանքով հազարավոր խաղաղ բնակիչներ են զոհվել. ՌԴ ՊՆ ներկայացուցիչ
Ռուսաստանի Դաշնության պաշտպանության նախարարության ներկայացուցչի հայտարարության համաձայն՝ նախորդ տարվա ընթացքում ԱՄՆ ռազմաօդային ուժերի կողմից հասցված ավիահարվածների արդյունքում զոհվել են Իրաքի և Սիրայի հազարավոր խաղաղ բնակիչներ: Այս մասին գրում է ռուսական «Ռիա Նովոստի» լրատվական գործակալությունը:
ՌԴ ՊՆ ներկայացուցչի հայտարարությունը պատասխան էր ԱՄՆ Զինված ուժերի Կենտրոնական հրամանատարության ներկայացուցիչ, գնդապետ Ջոն Թոմասին, ով վերջերս հայտարարել էր, թե նախորդ տարվա նոյեմբերից մինչև այս տարվա սեպտեմբերը ԱՄՆ-ի կողմից հասցված ավիահարվածների հետևանքով Իրաքում և Սիրիայում քաղաքացիական անձանց շրջանում զոհերի թիվը չի գերազանցում յոթ տասնյակը:
«Լսելով ԱՄՆ Զինված ուժերի Կենտրոնական հրամանատարության հայտարարությունը՝ տպավորություն է ստեղծվում, որ կոալիցիոն ուժերի ավիահարվածների հետևանքով զոհված հազարավոր խաղաղ բնակիչներին Պենտագոնում «մարդ» չեն համարում», - ասել է ՌԴ ՊՆ ներկայացուցիչը: Նա նշել է նաև, որ ամերիկյան ավիացիան օրական 20 հարված է հասցնում Իրաքում և Սիրիայում, իսկ վերջին տարվա ընթացքում հասցված ավիահարվածների թիվը հասնում է 7300-ի:
2014թ-ից ԱՄՆ-ն, դաշնակիցների հետ միասին, Իրաքում և Սիրիայում Իսլամական պետության դեմ ռազմական գործողություններ է իրականացնում, ընդ որում՝ Սիրիայում գործելով առանց տեղի իշխանությունների թույլտվության: