Կաշառք վերցնելու պահին ձերբակալվել է ՌԴ տնտեսական զարգացման նախարարը

Նոյեմբերի 15-ին իրավապահները ձերբակալել են Ռուսաստանի Դաշնության տնտեսական զարգացման նախարար Ալեքսեյ Ուլյուկաևին: Նա մեղադրվում է կաշառակերության մեջ: Այս մասին հայտնում է ռուսական «Ռիա Նովոստի» լրատվական գործակալությունը՝ հղում կատարելով ՌԴ քննչական կոմիտեի մամուլի ծառայությանը:

Աղբյուրը նշում է, որ Ուլյուկաևը ձերբակալվել է 2 միլիոն ԱՄՆ դոլար կաշառք վերցնելու պահին: Նշված գումարի դիմաց նա պետք է թույլ տար «Ռոսնեֆտ» ընկերությանը գնել «Բաշնեֆտ» ընկերության բաժնետոմսերի պետական փաթեթը:

Ռուսաստանի Դաշնության վարչապետ Դմիտրի Մեդվեդևը նախագահ Վլադիմիր Պուտինի հետ քննարկել է նախարարի ձերբակալությունը: ՌԴ նախագահի մամուլի խոսնակ Դմիտրի Պեսկովը նշում է, որ Վլադիմիր Պուտինին նախօրոք զեկուցվել է նախարարի ձերբակալության մասին:

Ալեքսեյ Ուլյուկաևի նկատմամբ քրեական գործ կհարուցվի առաձնապես խոշոր չափի կաշառ վերցնելու համար: Վերջինիս սպառնում է մինչև 15 տարվա ազատազրկում: