Վլադիմիր Պուտինը հայ-ռուսական համատեղ զորամիավորում ստեղծելու մասին հրամանագիր է ստորագրել
Նոյեմբերի 14-ին Ռուսաստանի նախագահ Վլադիմիր Պուտինը հրամանագիր է ստորագրել, որով հավանություն է տվել հայ-ռուսական համատեղ զիրամիավորում ստեղծելու Ռուսաստանի կառավարության առաջարկին: Այս մասին հայտնում է ռուսական «Տասս» լրատվական գործակալությունը:
Նշվում է, որ երկու երկրների միացյալ զորամիավորումը ստեղծվում է տարածաշրջանում հնարավոր սպառնալիքներին դիմակայելու նպատակով: Ըստ համաձայնագրի՝ համատեղ զորախմբի ղեկավարին նշանակելու է հայկական կողմը՝ Ռուսաստանի Զինված ուժերի գերագույն գլխավոր հրամանատարի համաձայնությամբ:
Փաստաթղթում նշվում է, որ խաղաղ ժամանակ զորամիավորումը ենթարկվելու է ՀՀ Զինված ուժերի Գլխավոր շտաբին, իսկ պատերազմական իրավիճակում՝ Ռուսաստանի Հարավային օկրուգի զորքերի հրամանատարությանը:
Նախատեսվում է, որ համաձայնագիրը կստորագրվի 5 տարի ժամկետով: Ժամկետը լրանալուց հետո այն ևս 5 տարով կերկարաձգվի, եթե կողմերից որևէ մեկը համագործակցությունը դադարեցնելու ցանկություն չհայտնի: