Հայաստանը Քրդստանի աշխատավորական կուսակցությանը պայթուցիկ է մատակարարում. Վաթան
«Հայերի անհիմն պնդումների դեմ պայքարի միության» (ԱՍԻՄԴԵՐ) նախագահ Գյոքսել Գյուլբեյը հայտարարել է, որ ամսական ավելի քան 10 բեռնատար Մերսինի նավահանգստից բեռնվում և անցնում է Հայաստան՝ տեղափոխելով ամոնիումի նիտրատ պարունակող պարարտանյութեր (քրդերն այս նյութը սովորաբար օգտագործում են պայթուցիկներ պատրաստելու համար - խմբ.): Այս մասին գրում է թուրքական gazetevatan.com լրատվական կայքը:
ԱՍԻՄԴԵՐ-ի նախագահը նշել է, որ Քրդական աշխատավորական կուսակցությունը (PKK) «Հայաստանի կողմից զավթված ադրբեջանական Ղարաբաղում» ճամբարներ է հիմնել և ամոնիմումի նիտրատ պարունակող պարարտանյութերը Կարսի և Իգդիրի վրայով, ինչպես նաև Իրանի տարածքով փոխադրում է Վանի նահանգ հետագայում ահաբեկչական գոծողություններ իրականացնելու նպատակով: «Հայաստանը Քրդսանի աշխատավորական կուսակցությանը լոգիստիկ աջակցություն է ցուցաբերում՝ նրանց զենք է մատակարարում և աջակցում եվրոպական երկրների վիզայի տրամադրման հարցում: Եվրոպայում հայկական դեսպանատների միջոցով Մերսինի նավահանգիստ տեղափոխվող ամոնիումի նիտրատը Վրաստանի կամ Իրանի վրայով տեղափոխվում է Հայաստան՝ առանց թուրքական մաքսային ծառայությունների կամ ոստիկանության կողմից զննության ենթարկվելու: Հայաստանի բնակչությունն ու գյուղատնտեսության տոկոսային մասնաբաժինը հայտնի է, ուստի և անհասկանալի է, թե այդքան ամոնիումի նիտրատը որտեղ է կիրառվում», - նշել է Գյուլբեյը:
Ընդգծելով, որ Հայաստանի ու Քրդստանի աշխատավորական կուսակցության միջև առկա է ռազմավարական համագործակցություն՝ ԱՍԻՄԴԵՐ-ի նախագահը հայտարարել է. «Ակնհայտ է, որ հայկական պետությունը և լոբբին փայփայում է Թուրքիայի հարավարևելյան շրջաններում պետություն ստեղծելու երազանքը: Մեզ խորապես անհանգստացնում է, որ Հայաստանը տեղափոխում է տեղական պահանջարկը գերազանցող քանակի ամոնիումի նիտրատ: Այդ ավելցուկը մաքսանենգ ճանապարհով անցկացվում է մեր սահմաններից ներս և օգտագործվում մեր երկրի զինուժի, ոստիկանության և քաղաքացիների դեմ կիրառվող պայթուցիկներում»:
Գյուլբեյը զգուշացրել է առևտրի և մաքսային հարցերով, արտաքին գործերի և ներքին գործերի նախարարություններին, որ վերջիններիս համապատասխան ստորաբաժանումները անհրաժեշտ զննության ենթարկեն դեպի Հայաստան փոխադրումներ իրականացնող բեռնատարները: