Դոնալդ Թրամփը հակված է պետքարտուղարի պաշտոնում նշանակել Միթ Ռոմնիին. WSJ
ԱՄՆ նորընտիր նախագահ Դոնալդ Թրամփը պետքարտուղարի պաշտոնում հակված է նշանակել Մասսաչուսեթսի նախկին նահանգապետ Միթ Ռոմնիին. գրում է ամերիկյան «The Wall Street Journal» թերթը:
Աղբյուրի համաձայն՝ Թրամփի անցումային թիմի խորհրդականների խումբը դրդում է վերջինիս կատարել այդ ընտրությունը: Տեղեկություն կար, որ պետքարտուղարի անունը պարզ կդառնա մինչև նոյեմբերի 22-ը, սակայն, ինչպես տեսնում ենք, Թրամփը դեռ լռում է:
Պարբերականը գրում է նաև, որ, ամենայն հավանականությամբ, ԱՄՆ-ի պաշտպանության նախարար կդառնա գեներալ Ջեյմս Մատիսը, իսկ ՄԱԿ-ում ԱՄՆ-ի դեսպանի պաշտոնը կզբաղեցնի Հարավային Կարոլինայի նահանգապետ Նիկի Հելին:
69-ամյա Միթ Ռոմնին հանրապետական կուսակության անդամ է: 2012թ-ին նա մասնակցել է ԱՄՆ-ի նախագահական ընտրություններին, որտեղ պարտվել է գործող նախագահ Բարաք Օբամային: Ռոմնին եղել է Իրաք և Աֆղանստան ամերիկյան զորքերի խնդրահարույց ներխուժման ակտիվ աջակիցներից: Նա կտրուկ քննադատել է Օբամային՝ Լիբիայում քաղաքացիական պատերազմի ժամանակ ապստամբներին բավարար աջակցություն ցույց չտալու համար: Այս գործիչը հայտնի է նաև Ռուսաստանի, Իրանի և Չինաստանի հասցեին իր կոշտ հայտարարություններով: Իր գրքում նա գրել է, որ Ռուսաստանը համարվում է ԱՄՆ-ի գլխավոր թշնամին:
2016թ-ի նախընտրական քարոզարշավի ժամանակ Ռոմնին բազմիցս հանդես է եկել Թրամփի հասցեին ամենասուր քննադատություններով: Վերջինիս հետ նա պայքարել է հանրապետականների ներկուսակցական փրայմերիզի ժամանակ: