Եվրոպական խորհրդարանը հավանություն է տվել ռուսական լրատվամիջոցներին հակազդելու վերաբերյալ փաստաթղթին

Նոյեմբերի 23-ին Եվրոպական խորհրդարանը բանաձև է ընդունել, որով կոչ է արվում պայքարել Կրեմլի քարոզչության դեմ: Փաստաթղթի համաձայն՝ «Sputnik» լրատվական գործակալությունը և «RT» հեռուստաալիքը Եվրոպայի համար ոչ պակաս վտանգավոր են, քան արմատական իսլամիստները: Այս մասին հայտնում է «Euronews» լրատվական գործակալությունը:

Բանաձևի ընդունման համար քվեարկությանը մասնակցել է 691 պատգամավոր: Փաստաթղթին կողմ է քվեարկել 304, իսկ դեմ՝ 179 պատգամավոր: Եվս 208 պատգամավոր ձեռնպահ է մնացել:

Փաստաթղթում նշվում է, որ Ռուսաստանը ֆինանսավորում է ԵՄ անդամ երկրների ընդդիմադիր քաղաքական կուսակցություններին և կազմակերպություններին: Բանաձևի հեղինակների խոսքով՝ Եվրոպական Միության հետ հարաբերություններում Ռուսաստանը վարում է թշնամական քարոզչություն: Բազմաթիվ պատգամավորներ իրենց ելույթներում ռուսական քարոզչությանը հակազդելը համեմատել են Իսլամական պետության դեմ պայքարի հետ: Նշվում է նաև, որ բանաձևի հեղինակներն առաջարկել են հակաքարոզչություն իրականացնելու համար լրացուցիչ ֆինանսավորում հատկացնել:

Ընդունված փաստաթուղթը կրում է խորհրդատվական բնույթ և չի պարտադրում ԵՄ անդամ երկրներին կատարել այն: