Եվրախորհրդարանն ընդունել է Թուրքիայի եվրաինտեգրման հարցով բանակցությունները սառեցնելու մասին բանաձև

Նոյեմբերի 24-ին Ստրասբուրգում կայացած Եվրախորհրդարանի լիագումար նիստում բանաձև է ընդունել, որով կոչ է արվում ԵՄ-ին սառեցնել Թուրքիայի հետ եվրաինտեգրման հարցով բանակցությունները: Այս մասին հայտնում է «Եվրոնյուզը»:

Աղբյուրի համաձայն՝ բանաձևի ընդունմանը կողմ է քվեարկել 479, դեմ՝ 37 պատգամավոր: 107 պատգամավոր ձեռնպահ է մնացել:

Այս որոշումը պայմանավորված է Թուրքիայում հուլիսյան հեղաշրջման անհաջող փորձից հետո իշխանությունների սկսած ճնշումների, ապօրինի ձերբակալությունների, մահապատիժը վերականգնելու մասին հայտարարությունների հետ:

Թուրքիայի Եվրպական Միության հարցերով նախարար և գլխավոր բանագնաց Օմեր Չելիքը մեկնաբանել է Եվրախորհրդարանում անցկացված քվեարկության արդյունքները, - «Այն ժամանակ, երբ Թուրքիան ակտիվորեն պայքարում է ահաբեկչության դեմ, Եվրոպայում անցկացվում են միակողմանի և ոչ հեռանկարային քննարկումներ»:

Ավելի վաղ՝ նոյեմբերի 23-ին, Թուրքիայի նախագահ Ռեջեփ Թայիփ Էրդողանը հայտարարել էր, որ Ստրասբուրգում ընդունվելիք որոշումն իրենց համար ոչ մի արժեք չունի:

Ընդունված որոշումը, սակայն, ընդհամենը քաղաքական ուղերձ էր Եվրոպական Միության անդամ երկրներին: Եվրախորհրդարանը իրավասու չէ կասեցնել Թուրքիայի եվրաինտեգրման հարցով բանակցությունները: