Սիրիայում ԻՊ-ի հետ բախումների հետևանքով թուրք զինվորական է զոհվել
Վերջին օրերի ընթացքում Սիրիայում թուրք զիվորականների և ԻՊ զինյալների միջև բախումների հետևանքով զոհվել է մեկ, իսկ վիրավորվել՝ 6 թուրք զինծառայող: Այս մասին հայտնում է «Ռոյթերս» լրատվականը՝ հղում կատարելով թուրք զինվորականների հայտարարություններին:
Աղբյուրի հավաստմամբ՝ վերջին մեկ օրվա ընթացքում բախումների հետևանքով զոհվել է Թուրքիայի կողմից աջակցություն ստացող «չափավոր ընդդիմության» 4 զինվորական, վիրավորվել՝ 25-ը:
Նշենք, որ այս տարվա օգոստոսի 24-ից Թուրքիայի զինված ուժերը սիրիական ազատ բանակի օժանդակությամբ իրականացնում են «Եփրատի վահան» ռազմական գործողությունը, որի նպատակն է Սիրիայի հյուսիսային Ջերաբլուս քաղաքն ազատագրել ԻՊ գրոհայիններից: Այս գործողությամբ Թուրքիայի իշխանությունները ցանկանում են անվտանգության գոտի ստեղծել Սիրիայի հյուսիսային շրջաններում: