ՆԱՏՕ-ի գլխավոր քարտուղարը կոչ է արել Ռուսաստանին համակերպվել դաշինքի ընդլայնման հետ
Նոյեմբերի 24-ին ՕքսՖորդի համալսարանում ունեցած ելույթի ժամանակ ՆԱՏՕ-ի գլխավոր քարտուղար Յենս Սթոլթենբերգը հայտարարել է, որ Ռուսաստանը պետք է «հաշտվի» դաշինքի ընդլայնման հետ: Այս մասին հայտնում է «Ռիա Նովոստին»:
«ՆԱՏՕ-ի գործողությունները կրում են պաշտպանական բնույթ: Մենք չենք ցանկանում նոր սառը պատերազմ և խուսափում ենք Ռուսաստանի հետ առճակատումից», - ասել է Սթոլթենբերգը:
Գլխավոր քարտուղարը ՆԱՏՕ-ի դիրքերի ամրապնդումը Արևելյան Եվրոպայում ներկայացրել է որպես «պատերազմը կանխելու համար Ռուսաստանին զսպելու» քաղաքականություն: Դաշինքի ղեկավարը նշել է նաև, որ իրենք, ամեն դեպքում, պատրաստ են Ռուսաստանի հետ երկխոսության գնալ:
«Ես չեմ կարողանում հասկանալ, թե ինչու է Ռուսաստանը սադրանք համարում այն, որ ՆԱՏՕ-ն, Արևելյան Եվրոպայում և Կենտրոնական Ասիայում նոր դաշնակիցներ ձեռք բերելով, ընդլայնում է իր աշխարհագրությունը: Ոչ թե դաշինքն է ընդլայնվել դեպի արևելք, այլ Լեհաստանը, Լատվիան, Լիտվան, Էստոնիան և Հունգարիան են դիմել անդամակցության համար: Ռուսաստանը պետք է հանգստանա և ընդունի այն փաստը, որ իր հարևաններն իրենք են ընտրում իրենց ուղին», - ավելացրել է Սթոլթենբերգը:
Նշենք, որ այս տարվա հուլիսին Լեհաստանի մայրաքաղաք Վարշավայում կայացած գագաթնաժողովում ՆԱՏՕ-ի անդամ երկրները որոշում են կայացրել դաշինքի 4000-անոց ռազմական ստորաբաժանում տեղակայել Արևելյան Եվրոպայում (ավելի կոնկրետ՝ Լեհաստանում, Լատվիայում, Լիտվայում և Էստոնիայում): Սառը պատերազմից հետո սա դաշինքի ուժերի ամենամասշտաբային կենտրոնացումն է տվյալ տարածաշրջանում, ինչը, իհարկե, չի կարող չանհանգստացնել Ռուսաստանի ղեկավարությանը: