Քերին ցանկանում է օր առաջ համաձայնության գալ Ռուսաստանի հետ. WP
ԱՄՆ պետքարտուղար Ջոն Քերին, չնայած մոտալուտ պաշտոնաթողությանը, ջանք չի խնայում Հալեպի հարցով Ռուսաստանի հետ համաձայնության հասնելու համար, գրում է Washington Post-ը:
Աղբյուրի համաձայն՝ Քերին աներևակայելի դիվանագիտական ջանքեր է գործադրում Ռուսաստանի հետ Հալեպի պաշարմանը վերջ տալու համաձայնություն ձեռք բերելու համար: Պարբերականը նշում է, որ Քերին մեկ շաբաթվա ընթացքում երկու անգամ հեռախոսազրույց է ունեցել Ռուսաստանի Դաշնության արտաքին գործերի նախարար Սերգեյ Լավրովի հետ: Երկու երկրների արտաքին գերատեսչությունների ղեկավարները Հալեպի հարցը քննարկել են նաև Պերուի մայրաքաղաքում կայացած Ասիական և խաղաղօվկիանոսյան տնտեսական համագործակցության (ԱԽՏՀ) գագաթնաժողովի շրջանակներում ունեցած հանդիպման ժամանակ:
Washington Post-ի տվյալներով՝ Քերին մտավախություն ունի, որ ԱՄՆ-ի նորընտիր նախագահ Դոնալդ Թրամփը նախագահական լիազորությունները ստանձնելուց հետո Մոսկվայի հետ նոր համաձայնություններ ձեռք կբերի, ինչի արդյունքում՝ Վաշինգտոնը ուղղակիորեն կհայտնվի Ասադի աջակիցների կողմում:
Վերջին մեկ ամսվա ընթացքում իրավիճակը Հալեպում կտրուկ սրվել է. քաղաքում և դրա շրջակայքում ընթանում են կատաղի մարտեր: Ահաբեկիչները քաղաքի արևելյան շրջաններում պատանդ են պահում մոտ 200-300 հազար խաղաղ բնակչի:
Սիրիայի հարցով հաշտեցման ռուսական կենտրոնի վերջին տվյալների համաձայն՝ նոյեմբերի 27-ին սիրիական զորքերը ահաբեկիչներից ազատագրել են Հալեպի 8 թաղամաս, որտեղից տարհանվել է մոտ 2500 խաղաղ բնակիչ: