Հայտնի է ֆրանսիայի հաջորդ նախագահի ամենահավանական թեկնածուի անունը

Ֆրանսիայի նախկին վարչապետ Ֆրանսուա Ֆիյոնը հաղթել է  Ֆրանսիայի աջ պահպանողական հանրապետական կուսակցության ներկուսակցական ընտրություններում: Այս մասին հաղորդում է «Ֆրանս Պրես» գործակալությունը:

Աղբյուրի համաձայն՝ ներկուսակցական ընտրություններն անցացվել են երկու փուլով: Առաջին փուլում, որն անցկացվել է նոյեմբերի 20-ին, Ֆիյոնն անսպասելի հաղթանակ է տարել՝ հավաքելով ձայների 44,1%-ը: Ալեն Ժուպեն, հավաքելով 28,6% ձայն, Ֆիյոնի հետ անցել է երկրորդ փուլ, իսկ Ֆրանսիայի նախկին նախագահ Նիկոլա Սարկոզին դուրս է մնացել պայքարից՝ հավաքելով 20,7% ձայն: Երկրորդ փուլում Ֆրանսուա Ֆիյոնը հավաքել է 66,6% ձայն, իսկ Ալեն Ժուպեն՝ 33,4%: Նշվում է, որ Ալեն Ժուպեն և Նիկոլա Սարկոզին արդեն ընդունել են իրենց պարտությունը ներկուսակցական ընտրություներում և շնորհավորել են Ֆիյոնին հաղթանակի կապակցությամբ:

Նշենք, որ 2007-2012 թվականներին, երբ Ֆրանսիայի նախագահը Նիկոլա Սարկոզին էր, Ֆրանսուա Ֆիյոնը զբաղեցրել է Ֆրանսիայի վարչապետի պաշտոնը, իսկ Ալեն Ժուպեն նույն պաշտոնին եղել է 1995-1997 թվականներին. այդ ժամանակ Ֆրանսիայի նախագահը Ժակ Շիրակն էր:

Աջ պահպանողական հանրապետական կուսակցությունը Ֆրանսիայի ամենախոշոր ընդդիմադիր ուժն է: Հաշվի առնելով երկրում ստեղծված իրավիճակը՝ բազմաթիվ վերլուծաբաններ նշում են, որ հաջորդ տարվա ապրիլին կայանալիք նախագահական ընտրություններում կհաղթի հենց Ֆրանսուա Ֆիյոնը: