Թուրքիայում Մոնթե Մելքոնյանի պատվին հուշարձան է կանգնեցվել
Թուրքիայում հուշարձան է կանգնեցվել ՀՀ ազգային հերոս Մոնթե Մելքոնյանի և հայ ազատագրական պայքարի այլ հերոսների պատվին: Այս մասին գրում է թուրքական «Սյոզջու» թերթը:
Աղբյուրի հավաստմամբ՝ հուշարձանը կանգնեցվել է այս տարվա ապրիլին Դերսիմ (Թունջելի) նահանգի Նիզամիյե գավառի Աշաղը Դոլուջա գյուղում գտնվող Փեմբելիք Բարաժ լճի ափին: Հուշարձանի վրա գրված է. - «Դատապարտում ենք Հայոց Ցեղասպանությունը: Հարգում ենք Արմենակ Բաքըրջյանի և Հրանտի հիշատակը»:
Բացի Մոնթե Մելքոնյանից հուշարձանի վրա կարելի է տեսնել Մանուել Դեմիրի, Գևորգ Չաուշի, Արմենակ Բաքըրջյանի, Նուբար Յանըքյանի, Անդրանիկ Ուզունյանի անունները:
Նշվում է, որ հուշարձանի բացմանը ներկա են եղել ինչպես Հայկական սփյուռքի ներկայացուցիչներ, այնպես էլ՝ քրդական Ժողովրդադեմոկրատական կուսակցության անդամներ:
«Հայերի անհիմն պնդումների դեմ պայքարի միության» (ԱՍԻՄԴԵՐ) նախագահ Գյոքսել Գյուլբեյը, արձանգանքելով Դերսիմում հայ հերոսների պատվին կանգնեցված հուշարձանի մասին տարածված լուրերին, հայտարարել է. «Կանգնեցված հուշարձանն անարգանք է ԱՍԱԼԱ կոչվող հայկական ահաբեկչական խմբի կողմից սպանված թուրք դիվանագետների և Ղարաբաղում զոհված ադրբեջանցիների նկատմամբ»:
Գյոքսելը նշել է, որ Հայկական սփյուռքն արդեն սկսել է գործունեություն ծավալել անջատողական խմբերի հետ հենց Թուրքիայի ներսում: Նրա խոսքով՝ ԱՍԻՄԴԵՐ-ը հետևողական կլինի, որ հուշարձանն ապամոնտաժվի, իսկ հուշարձանի հեղինակները ենթարկվեն անհրաժեշտ պատասխանատվության: