Մոտ վեց հազար խաղաղ բնակչի հաջողվել է փրկվել ահաբեկիչներից

Ավելի քան 5600 խաղաղ բնակիչ` այդ թվում 2800 երեխա,  կարողացել է հեռանալ Հալեպի՝ ահաբեկիչների կողմից հսկվող շրջաններից: Այս մասին հաղորդում է ռուսական «Ռիա Նովոստի» լրատվականը:

Ռուսաստանի Դաշնության պաշտպանության նախարարության պաշտոնական ներկայացուցիչ գեներալ-մայոր Իգոր Կոնաշենկովը հայտարարել է, որ Սիրիայի հարցով հաշտեցման ռուսական կենտրոնի աշխատակիցները օժանդակել են բնակիչների տարհանմանը նշված թաղամասերից: Նրա խոսքով՝ բնակիչները տեղափոխվել են սիրիական իշխանությունների կողմից նախօրոք պատրաստված հումանիտար կենտրոններ: Նրանք ապահովվել են սնունդով և անհրաժեշտ բժշկական օգնությամբ:

Ավելի վաղ հայտնի էր դարձել, որ սիրիական զորքերին հաջողվել է Հալեպի արևելյան շրջաններն (այստեղ ապրում է ավելի քան 90.000 մարդ) ամբողջովին ազատագրել ահաբեկիչներից:

Սիրիայի հարցով հաշտեցման ռուսական կենտրոնից հայտնում են, որ նախորդ օրվա ընթացքում նշված շրջաններից 507 ահաբեկիչ վայր է դրել զենքը և հանձնվել: Նրանցից 484-ը եղել են տեղի բնակիչներ և համաներման են արժանացել: