Էրդողանը ցանկանում է Ասադին հեռացնել իշխանությունից

Թուրքական բանակը գործողություն է սկսել Սիրիայի տարածքում, որի նպատակը նախագահ Բաշար Ասադին իշխանությունից հեռացնելն է: Այս մասին գրում է Reuters-ը՝ հղում կատարելով Թուրքիայի նախագահ Ռեջեփ Թայիփ Էրդողանի՝ նոյեմբերի 29-ի հայտարարությանը:

«Մեզ պետք չեն սիրիական հողերը: Մենք այնտեղ ենք, որ վերականգնենք արդարությունը և վերջ տանք դաժան բռնակալ Ասադի տիրապետությանը, ով աջակցում է պետական ահաբեկչությանը», - ասել է Էրդողանը:

Նոյեմբերի 26-ին Կրեմլի մամուլի ծառայությունը տեղեկություն էր տարածել, որ Ռուսաստանի նախագահ Վլադիմիր Պուտինը հեռախոսազրույց է ունեցել Էրդողանի հետ, որի ժամանակ երկու նախագահները մտքեր են փոխանակել սիրիական ճգնաժամի կարգավորման վերաբերյալ:

Մոտ մեկ ամիս առաջ Էրդողանը հայտարարել էր, որ թուրքական բանակը շարժվում է դեպի Մանբիջ և Ռաքքա: Նշենք նաև, որ այս տարվա օգոստոսի 24-ից Թուրքիայի զինված ուժերը սիրիական ազատ բանակի օժանդակությամբ իրականացնում են «Եփրատի վահան» ռազմական գործողությունը, որի նպատակն է Սիրիայի հյուսիսային Ջերաբլուս քաղաքն ազատագրել ԻՊ գրոհայիններից: Այս գործողությամբ Թուրքիայի իշխանությունները ցանկանում են անվտանգության գոտի ստեղծել Սիրիայի հյուսիսային շրջաններում: