Պուտինը պատմել է Թրամփի հետ ունեցած հեռախոսազրույցի մասին
Նոյեմբերի 30-ին Ռուսաստանի Դաշնության նախագահ Վլադիմիր Պուտինը «Պրիմակովյան ընթերցումներ» միջազգային ֆորումի ժամանակ ունեցած ելույթում պատմել է իր և ԱՄՆ նորընտիր նախագահ Դոնալդ Թրամփի միջև վերջերս կայացած հեռախոսազրույցի մասին. գրում է ռուսական «Ռիա Նովոստի» լրատվականը:
«Մենք եկանք այն մտքին, որ պետք է շտկել ռուս-ամերիկյան հարաբերությունների ներկայիս անմխիթար վիճակը: Ինչպես ես բազիցս նշել եմ, մեր երկիրը պատրաստ է այդ ուղղությամբ քայլեր կատարել», - ասել է Պուտինը:
Նա նշել է նաև, որ պետք չէ Ռուսաստանին մեղադրել ԱՄՆ-ի հետ արաբերությունների վատացման մեջ: «Այժմ, երբ Սպիտակ Տուն նոր նախագահ է գալու, շատ կցանկանայի հավատալ, որ հնարավորություն կլինի հարաբերությունները լավացնել: Դա շատ կարևոր է ոչ միայն երկու երկրների ժողովուրդների, այլ նաև՝ միջազգային կայունություն և անվտանգություն ապահովելու համար», - ավելացրել է Պուտինը:
Ռուսաստանի նախագահը անհրաժեշտություն է համարել նաև ահաբեկչության դեմ պայքարի համատեղ ճակատ ստեղծելը: Նրա խոսքով՝ Մերձավոր Արևելքում կոնֆլիկտի կարգավորման համար անհրաժեշտ է բոլոր շահագրգիռ կողմերի արդյունավետ համագործակցությունը:
Նշենք, որ Պուտինի և Թրամփի հեռախոսազրույցը տեղի է ունեցել նոյեմբերի 14-ին: