Սիրիական ընդդիմությունը և Ռուսաստանը բանակցում են առանց ԱՄՆ-ի
«Սիրիայի ընդդիմադիր եւ հեղափոխական ուժերի ազգային կոալիցիան» հաստատել է այն տեղեկությունը, որ Անկարայում բանակցություններ են ընթանում Ռուսաստանի և սիրիական ընդդիմության ներկայացուցիչների միջև Հալեպում տիրող իրավիճակի կարգավորման հարցով: Այս մասին ռուսական «Ռիա Նովոստիին» հայտնել է սիրիական ընդդիմության կոալիցիայի ներկայացուցիչ Սամիր Նաշարը:
Նրա խոսքով՝ հանդիպումները տևել են 3 օր: Թուրքիայի և Ռուսաստանի ներկայացուցիչների մասին, սակայն, սիրիական ընդդիմության ներկայացուցիչը տեղեկություն չի տվել: Նա հավելել է նաև, որ կողմերը փորձում են Հալեպում ստեղծված իրավիճակի կարգավորման ծրագիր մշակել՝ ՄԱԿ-ի դեսպանորդ Ստեֆան Դե Միստուրայի առաջարկի հիման վրա. այն է՝ բնակչությանը տարհանելու համար ստեղծել անվտանգ միջանցքներ և դադարեցնել կրակը:
Սիրիական ընդդիմության ներկայացուցչի տեղեկությունների համաձայն՝ Հալեպում պաշարման մեջ մնացած խումբը որոշում է կայացրել չհեռանալ քաղաքից և մինչև վերջ կռվել: «Քաղաքում կռվող խումբն արդեն ինքն է որոշումներ կայացնում և սկսել է չենթակվել քաղաքից դուրս գտնվող հրամանատարությանը», - ավելացրել է նա:
Նշենք, որ ավելի վաղ Financial Times-ը տեղեկություն էր տարածել Ռուսաստանի և սիրիական ընդդիմության ներկայացուցիչների միջև Հալեպում տիրող իրավիճակի շուրջ Թուրքիայում ընթացող գաղտնի բանակցությունների մասին: Աղբյուրն ընդգծում է, որ ԱՄՆ-ն չի մասնակցում բանակցություններին: