«Թուրքական հոսքի» մասին համաձայնագիրն օրենքի ուժ է ստացել
Թուրքիայի Ազգային մեծ ժողովն օրենք է ընդունել, որը վավերացնում է «Թուրքական հոսք» գազատարի կառուցման մասին Ռուսաստանի հետ ստորագրած միջկառավարական համաձայնագիրը: Այս մասին գրում է թուրքական «Միլլիյեթ» լրատվականը:
Աղբյուրի համաձայն՝ փաստաթուղթն ընդունվել է ձայների 210 կողմ, 7 դեմ և 6 ձեռնպահ հարաբերակցությամբ: Առաջիկայում նախատեսվում է, որ նախագահ Էրդողանը կվավերացնի օրենքը, որից հետո այն ուժի մեջ կմտնի:
Ավելի վաղ Թուրքիայի էներգետիկայի և բնական պաշարների նախարար Բերաթ Ալբայրաքը հայտարարել էր, որ «Թուրքական հոսք» գազատարի կառուցման աշխատանքները կսկսվեն 2017թ-ից:
Հիշեցնենք, որ այս տարվա հոկտեմբերի 10-ին Ռուսաստանի և Թուրքիայի միջև միջկառավարական համաձայնագիր էր ստորագրվել՝ «Թուրքական հոսք» գազատարի կառուցման նախագծի վերաբերյալ: Այս ծրագիրը նախատեսում է Ռուսաստանի Կրասնոդարի շրջանից Թուրքիա (ավելի կոնկրետ՝ Արևելյան Թրակիա) գնացող գազատար խողովակաշարի կառուցում, որն անցնելու է Սև ծովի տակով: Ակնկալվում է, որ գազատարի առաջին գիծը (15,75 միլիարդ խորանարդ մետր) սպասարկելու է թուրքական շուկան, իսկ երկրորդով նախատեսվում է գազն արտահանել Եվրոպա: Նշենք նաև, որ գազամուղի կառուցման ծրագիրը սառեցված էր անցյալ տարվա նոյեմբերից, երբ թուրք-սիրիական սահմանին թուրքական զինված ուժերը խոցեցին ռուսական ռազմական ինքնաթիռը: Ծրագրի շուրջ բանակցությունները վերսկսել են այս տարվա օգոստոսին՝ Թուրքիայի նախագահի՝ Սանկտ-Պետերբուրգ կատարած այցից հետո:
Նախատեսվում է, որ ծրագիրը ավարտին կհասցվի 2019թ-ի դեկտեմբերին: