Սիրիական բանակը հաջողություններ է գրանցում ոչ միայն Հալեպում

Հալեպի արևելյան շրջաններում սիրիական բանակի գրանցած հաջողությունների ֆոնին՝ ահաբեկիչները դադարեցրել են կրակը երկրի մյուս հատվածներում: Այս մասին գրում է ռուսական «Ռիա Նովոստին»՝ հղում կատարելով Սիրիայի հարցով հաշտեցման ռուսական կենտրոնի տարածած հաղորդագրությանը:

«Սիրիական բանակի՝ Հալեպի արևելյան թաղամասերն ահաբեկիչներից ազատագրելուց հետո Սիրիայի մյուս շրջաններում ևս զինյալները դադարեցրել են կրակը: 2016թ-ի դեկտեմբերի 1-ից Հան աշ-Շիխ քաղաքն (Դամասկոսից 15կմ հեռու) ամբողջապես անցել է սիրիական բանակի վերհսկողության տակ», - նշվում է հաղորդագրության մեջ:

Ավելի վաղ Սիրիայի իշխանությունները և ծայրահեղական խմբերի անդամները, ովքեր գրավել էին Դամասկոսի մոտակա Թելլ բնակավայրը, զինադադարի համաձայնություն էին ձեռք բերել: Ինչպես հայտնում է սիրիական «Sana» գործակալությունը, ձեռք բերված պայմանավորվածության համաձայն, զինյալները պետք է ազատեն նշված բնակավայրը, որտեղ ապրում է մոտ 700 հազար մարդ: