ԱՄՆ-ն Ռուսաստանին չի դիտարկում որպես թշնամի. Էշթոն Քարթեր
ԱՄՆ-ն պետք է Ռուսաստանի հետ համագործակցի այն ոլորտներում, որտեղ երկուսի շահերը համընկնում են: Այս մասին հայտարարել է ԱՄՆ պաշտպանության նախարար Էշթոն Քարթերը Կալիֆորնիայում կայացած անվտանգության թեմայով համաժողովի ժամանակ:
Պենտագոնի ղեկավարը մեղադրել է Մոսկվային՝ Ուկրաինայում և Սիրիայում վերջինիս վարած քաղաքականության և կիբերհարձակումներ իրականացնելու մեջ: «Սրանք այն գործողությունները չեն, որ կարելի է սպասել իր քայերի համար պատասխանատու պետության կողմից: Մենք Ռուսաստանի հետ չենք ուզում ո՛չ սառը, ո՛չ էլ, առավել ևս, թեժ պատերազմի մեջ մտնել: ԱՄՆ-ն չի ցանկանում Ռուսաստանին որպես թշնամի դիտարկել, սակայն պարտավոր է պաշտպանել իր դաշնակիցներին», - հայտարարել է Քարթերն իր ելույթի ժամանակ:
Պենտագոնի ղեկավարը հիշեցրել է նաև Եվրոպայում ՆԱՏՕ-ի «ռազմական աշխարհագրության» ընդլայնման և Մոսկվայի «ագրեսիվ գործողությունները» զսպելու իրենց պատրաստակամության մասին: Քարթերը սա համարում է հավասարակշռված մոտեցում իրենց կողմից:
Նշենք, ավելի վաղ ԱՄՆ Կոնգրեսն ընդունել էր հաջորդ տարվա ռազմական բյուջեի նախագիծը, որը չէր նախատեսում միջոցներ հատկացնել՝ Ռուսաստանի հետ ռազմական համագործակցության համար: Այս սահմանափակման վերացման նախապայմանը Ուկրաինայի և ՆԱՏՕ-ի անդամ երկրների նկատմամբ Ռուսաստանի ագրեսիվ քաղաքականության վերացումն է: Մոսկվան աբսուրդ է համարում Արևմուտքի այս մոտեցումը:
Հատկանշական է նաև, որ հաջորդ տարվա համար ԱՄՆ Կոնգրեսը նախատեսել է 350 միլիարդ դոլար ռազմական օգնություն տրամադրել Ուկրաինային: Ավելի վաղ՝ այս տարվա հուլիսին, Լեհաստանի մայրաքաղաք Վարշավայում կայացած գագաթնաժողովում ՆԱՏՕ-ի անդամ երկրները որոշում են կայացրել դաշինքի 4000-անոց ռազմական ստորաբաժանում տեղակայել Արևելյան Եվրոպայում (ավելի կոնկրետ՝ Լեհաստանում, Լատվիայում, Լիտվայում և Էստոնիայում): Սառը պատերազմից հետո սա դաշինքի ուժերի ամենամասշտաբային կենտրոնացումն է տվյալ տարածաշրջանում, ինչը, իհարկե, չի կարող չանհանգստացնել Ռուսաստանի ղեկավարությանը: