Ժամանակակից աշխարհում լսում են նրանց, ում ձայնն ավելի բարձր է հնչում. Պուտին

Միաբևեռ աշխարհի ստեղծման փորձերը ձախողվել են, իսկ հավասարակշռությունը միջազգային արենայում աստիճանաբար վերականգնվում է: Այս մասին հայտարարել է Ռուսաստանի նախագահ Վլադիմիր Պուտինը ռուսական НТВ հեռուստաալիքին տված հարցազրույցի ժամանակ, որը հեռարձակվել է Հեռավոր Արևելքում:

«Իրավիճակը փոխվում է: Կարծում եմ՝ ոչ մեկի համար գաղտնիք չէ, և բոլորն արդեն տեսնում են, որ մեր գործընկերներից շատերն իրենք են դիմում միջազգային իրավունքի սկզբունքներին, քանի որ հավասարակշռությունը միջազգային արենայում աստիճանաբար վերականգնվում է: Միաբևեռ աշխարհ ստեղծելու փորձերը ձախողվել են», - ասել է Վլադիմիր Պուտինը: Նա նաև նշել է, որ Ռուսաստանը, պաշտպանելով իր ազգային շահերը, պետք է հարգի նաև այլ պետությունների շահերը: «Ժամանակակից աշխարհում լսում են նրանց, ում ձայնն ավելի բարձր է հնչում», - ավելացրել է Պուտինը:

Անդրադառնալով «արաբական գարնանը»՝ Վլադիմիր Պուտինը նշել է, որ դա հետևանք է համաշխարհային քաղաքականության մեջ առանցքային դերակատարություն ունեցող երկրների միջազգային իրավունքի նորմերին չհետևելու և հանուն իրենց աշխարհաքաղաքական շահերի գործելու:

ՌԴ նախագահը հիշեցրել է նաև, որ հայտնի ակադեմիկոս, արևելագետ Եվգենի Պրիմակովը դեռևս բողոքի զանգվածային ակցիաների ժամանակ կանխագուշակել էր Մերձավոր Արևելքում իրադարձությունների այսպիսի զարգացումը: «Վստահ եմ՝ եթե ժամանակին լսեինք Պրիմակովին, ապա հնարավոր կլիներ խուսափել այժմ ստեղծված իրավիճակից», - ասել է Պուտինը: Նա նկատել է նաև, որ այն ժամանակ իրադարձությունների զարգացման վրա ազդեցություն ունենալու Ռուսաստանի հնարավորությունները բավականին սահմանափակ էին: