Գերմանիայում կարգելվի փարաջա կրել
Գերմանիայի կանցլեր Անգելա Մերկելը պատրաստվում է արգելել երկրում փարաջա կրել: Այս մասին գրում է The Independent-ը՝ հղում կատարելով Էսսենում դեկտեմբերի 6-ին կայացած Գերմանիայի «Քրիստոնեա դեմակրատական միություն» կուսակցության համագումարի ժամանակ կանցլերի արած հայտարարությանը:
«Զգեստը, որն ամբողջությամբ ծածկում է դեմքը, պետք է արգելվի կրել ամենուր, որտեղ դա հնարավոր է», - հայտարարել է Մերկելը, ինչին ներկաներն արձագանքել են բուռն ծափահարություններով:
Նշված համագումարի ժամանակ պետք է ընտրվի կուսակցության նախագահ: 2000թ-ից Մերկելը ղեկավարում է Գերմանիայի «Քրիստոնեա դեմակրատական միություն» կուսակցությունը: Ակնկալվում է, որ նա կվերընտրվի կուսակցության նախագահի պաշտոնում:
Նոյեմբերի 29-ին Հոլանդիայի խորհրդարանի ներկայացուցիչների պալատը կողմ է քվեարկել հասարակական վայրերում փարաջա կրելն արգելող օրենքին: Սակայն այն դեռևս պետք է հաստատի սենատը:
Հասարակական վայրերում փարաջա կրելն արգելող օրենք գործում է եվրոպական մի քանի երկրում: Ֆրանսիայում, օրինակ, այն գործում է 2011 թվականից: Այդ օրենքի ընդունումից հետո որոշ մահմեդականներ դիմել են դատարան՝ հայտարարելով, որ այն սահմանափակում է իրենց կրոնական ազատությունը: 2014թ-ի հուլիսին Մարդու իրավունքների եվրոպական դատարանի կայացրած որոշմամբ՝ իշխանությունների պահանջն օրինական է համարվել: Ֆրանսիայում փարաջա կրելու համար սահմանված է տուգանք՝ 150 եվրոյի չափով: