Սաթենիկ Թելֆեջյանը ժառանգություն ստացած հողատարածքը նվիրաբերել է Խարբերդի մանկատանը

ՀՀ կառավարության պաշտոնական կայքը (www.gov.am) հայտնում է, որ երեքշաբթի՝ դեկտեմբերի 6-ին, ՀՀ վարչապետ Կարեն Կարապետյանը կառավարությունում հյուրընալել է քաղաքացի Սաթենիկ Թելֆեջյանին, ով ցանկություն էր հայտնել Խարբերդ համայնքում գտնվող 31,7 հա հողատարածքը, որը նա ժառանգություն էր ստացել եղբորից, նվիրաբերության կարգով փոխանցել ՀՀ աշխատանքի և սոցիալական հարցերի նախարարության Խարբերդի մասնագիտացված մանկատանը:

Վարչապետ Կարեն Կարապետյանը շնորհակալություն է հայտնել տիկին Թելֆեջյանին նման նախաձեռնության համար. «Շատ շնորհակալ եմ ամեն ինչի համար, Ձեր՝ անհանգիստ լինելու համար, ցանկանում եմ Ձեզ ամենայն բարիք»:

Տիկին Թեֆեջյանն, իր հերթին, վարչապետին հաղջողություններ է մաղթել՝ նշելով. «Ես իմ կյանքի վերջին օղակում եմ և ի սրտե ցանկանում եմ Ձեզ հաջողություններ, որ իմ հայրենիքը շատ մեծ մակարդակի վրա հասնի, մեծ հույս ունեմ»: 

Հանդիպման վերջում Սաթենիկ Թելֆեջյանը և «Խարբերդի մասնագիտացված մանկատուն» ՊՈԱԿ-ի տնօրեն Հարություն Բալասանյանը ստորագրել են հողատարածքը նվիրաբերելու փաստաթուղթը՝ նոտարի հաստատմամբ: