Լավրովը և Շթայնմայերը քննարկել են սիրիական ճգնաժամի կարգավորման հարցը
Գերմանիայի և Ռուսաստանի արտաքին գործերի նախարարներ Ֆրանկ-Վալտեր Շթայնմայերը և Սերգեյ Լավրովը Համբուրգում ունեցած հանդիպման ժամանակ քննարկել են Հալեպում տիրող իրավիճակի հարցը: Այս մասին հայտնում է ռուսական «Ռիա Նովոստին»՝ հղում կատարելով գերմանական աղբյուրներին:
Աղբյուրի հավաստմամբ՝ քննարկման առանցքային թեման եղել է սիրիական ճգնաժամը և Հալեպում տիրող իրավիճակը: Քննարկվել է նաև Եվրոպայում ընդհանուր կայունության և անվտանգության հարցը:
Երկու երկրների արտաքին գերատեսչությունների ղեկավարները զրույցի ընթացքում անդրադարձել են Ուկրաինայում տիրող իրավիճակի և ԵԱՀԿ-ի շրջանակներում տնտեսական համագործակցության վերաբերյալ հարցերին:
Ինչպես հաղորդում է ռուսական «ՏԱՍՍ-ը»՝ հղում կատարելով Գերմանիայի արտգործնախարարության ներկայացուցչի հայտարարությանը՝ Շթայնմայերը Լավրովի հետ զրույցում նշել է, որ անհրաժեշտ է անմիջապես դադարեցնել կրակը Հալեպում և վերսկսել քաղաքական երկխոսությունը:
Լավրովը Հալեպում տիրող իրավիճակի հարցը քննարկել է նաև ԱՄՆ պետքարտուղար Ջոն Քերիի հետ: Պետքարտուղարության ներկայացուցիչ Ջոն Քիրբիի խոսքով՝ կողմերը քննարկել են հրադադարի ռեժիմ հաստատելու ուղիները և հայտնել են սիրիացի տասնյակ հազարավոր մարդկանց հումանիտար օգնություն տրամադրելու իրենց պատրաստակամության մասին:
Քերիի հետ հանդիպումից առաջ Լավրովը նշել էր, որ Ռուսաստանն աջակցում է Հալեպի վերաբերյալ ԱՄՆ-ի նախաձեռնությունը, ինչի մասին Քերին հայտարարել էր դեկտեմբերի 2-ին:
Ավելի վաղ՝ դեկտեմբերի 6-ին, ՌԴ արտգործնախարարը հայտարարել էր, որ Վաշինգտոնը հրաժարվել է Հալեպի արևեյան թաղամասերից զինյալներին դուրս բերելու մասին դեկտեմբերի 2-ի իր առաջարկից: «Տպավորություն կա, որ դա ընդամենը ժամանակ շահելու փորձ էր, ինչը հնարավորություն կտար զինյալներին «շունչ քաշել» և վերականգնել ուժերը: Ամերիկացիների հետ չի հաջողվում Սիրիայի հարցով լուրջ երկխոսության գնալ», - հայտարարել էր Լավրովը:
Լավրովի և Քերիի նախորդ՝ Հռոմում կայացած հանդիպմանը պետքարտուղարը Լավրովին էր փոխանցել Հալեպում իրավիճակի կարգավորման վերաբերյալ Վաշինգտոնի առաջարկը, որը, ՌԴ արտգործնախարարի խոսքով, տեղավորվում է այս խնդրի շուրջ ռուսական մոտեցումների ծիրում: