Կոալիցիոն ուժերը Մոսուլում հիվանդանոց են ռմբակոծվել

ԱՄՆ-ի կողմից գլխավորվող կոալիցիոն ուժերը հիվանդանոց են ռմբակոծել իրաքյան Մոսուլում: Այս մասին հայտնում է ԱՄՆ Զինված ուժերի Կենտրոնական հրամանատարությունը:

Աղբյուրը նշում է, որ հարվածը հասցվել է միտումնավոր և Իրաքի Զինված ուժերի խնդրանքով: Վերջիններս դեկտեմբերի 6-ին փորձել են գրոհով Մոսուլից դուրս քշել Իսլամական պետության ահաբեկիչներին և ռմբակոծել են «Ալ-Սալեմ» բժշկական կենտրոնը, որը գտնվում է քաղաքի արևելան մասում: ԱՄՆ ԶՈՒ Կենտրոնական հրամանատարության տվյաների համաձայն՝ նշված հիվանդանոցը ԻՊ զինյալներն օգտագործում էին որպես հրամանատարական կենտրոն: Սկզբում իրաքյան զինուժին հաջողվել էր գրավել քաղաքի այդ հատվածը, սակայն հետո նրանք ստիպված են եղել նահանջել:

Աղբյուրը տեղեկություն չի տալիս հիվանդանոցի ռմբակոծման հետևանքով խաղաղ բնակիչության շրջանում հնարավոր զոհերի կամ տուժածների մասին:

Ադրադառնալով Մոսուլի ազատագրման գործողությանը՝ Պենտագոնի պաշտոնական ներկայացուցիչ Ջեֆ Դեվիսը նշել է, որ Իրաքի Զինված ուժերն արդեն ամբողջությամբ շրջափակել են Մոսուլը, և քաղաքն, ըստ էության, մեկուսացված է:

Նշենք, որ հոկտեմբերի 17-ից Իրաքի կառավարական ուժերը և իրաքյան քրդերի ինքնապաշտպանական ջոկատները, ԱՄՆ-ի գլխավորած կոալիցիայի օգնությամբ, սկսել են ԻՊ-ից Մոսուլի ազատագրման գործողությունը: 2014թ-ի հունիսից Մոսուլը Իսլամական պետություն ահաբեկչական խմբավորման վերահսկողության տակ է և համարվում է Իրաքում ԻՊ կենտրոնը: