Ոչնչացվել է ԻՊ պարագլուխներից մեկը
Ամերիկյան օդուժը Սիրիայում ոչնչացրել է Իսլամական պետության պարագլուխներից մեկին՝ Բուբաքեր ալ-Հաքիմին, ով 2015թ-ի հունվարին մասնակցել էր ֆրանսիական «Charlie Hebdo» երգիծական շաբաթաթերթի խմբագրության վրա հարձակման կազմակերպմանը: Այս մասին հայտնում է ռուսական «ՏԱՍՍ»-ը՝ հղում կատարելով Պենտագոնի մամուլի ծառայության ներկայացուցչին:
«Charlie Hebdo-ի խմբագրության վրա հարձակման կազմակերպմանը մասնակցած ԻՊ պարագլուխը ոչնչացվել է ԱՄՆ ռազմաօդային ուժերի հասցրած ավիահարվածների արդյունքում», - հայտարարել է Պենտագոնի ներկայացուցիչը:
ԱՄՆ պաշտպանության նախարարության տվյաների համաձայն՝ 33 ամյա ալ-Հաքիմը ԻՊ-ում զբաղվում էր ահաբեկչությունների ծրագրմամբ: Նշվում է նաև, որ թունիսական արմատներով ֆրանսիացի այս ահաբեկիչը Charlie Hebdo-ի խմբագրության վրա հարձակում կատարած Քաուշի եղբայրների ուսուցիչն է եղել:
Ալ-Հաքիմը կռվել է ամերկացիների դեմ, երբ վերջիններս 2003թ-ին ներխուժել են Իրաք: 2008թ-ին նա ձերբակալվել է Սիրիայում և ուղարկվել Ֆրանսիա՝ պատիժն այնտեղ կրելու: 2011թ-ի սկզբին ազատ է արձակվել և գնացել է Թունիս: 2014թ-ին ստանձնել է թունիսցի երկու քաղաքական գործչի սպանության պատասխանատվությունը: Պենտագոնի հավաստմամբ՝ այդ ժամանակ նա արդեն առանցքային դեր էր խաղում ԻՊ ահաբեկչական խմբավորման գործունեության մեջ:
Նշենք, որ 2015թ-ի հունվարի 7-ին հարձակում էր կատարվել ֆրանսիական «Charlie Hebdo» երգիծական շաբաթաթերթի խմբագրության վրա, ինչի հետևանքով զոհվել էր 12 մարդ, ևս 11-ը՝ վիրավորվել: Հարձակումը կատարել էին Շերիֆ և Սաիդ Քաուշիները: