Հալեպում ավելի քան 350 զինյալ վայր է դրել զենքը
Դեկտեմբերի 12-ին Հալեպի արևելյան շրջաններում մոտ 375 զինյալ զենքը վայր է դրել և անցել քաղաքի արևմտյան մաս, որտեղ իրավիճակն ամբողջությամբ կառավարական զորքերի վերահսկողության տակ է։ Այս մասին հայտնում է «Ռիա Նովոստին»՝ հղում կատարելով Սիրիայի հարցով հաշտեցման ռուսական կենտրոնի հաղորդած տվյալներին։
Զինյալների վերահսկողության տակ գտնվող տարածքները կարողացել է լքել 7796 բնակիչ, որից 3946-ը՝ երեխա։ Նրանց տեղափոխել են մարդասիրական օգնության կենտրոններ։
Ավելի վաղ հաղորդվել էր, որ սիրիական բանակն աշխարհազորայինների հետ միասին սկսել է Հալեպի արևելյան Սալահեդդին թաղամասի ազատագրումը, որը զինյալների վերջին հենակետն է քաղաքում։ Աղբյուրը նշում է, որ մոտ ժամանակներս քաղաքն ամբողջովին ազատագրված կլինի։
Սիրիայում զինված հակամարտությունը շարունակվում է դեռևս 2011թ-ից։ Կառավարական զորքերի դեմ կռվում են տարբեր զինված խմբավորումներ, որոնցից ամենավտանգավորներն են Իսլամական պետություն և Ջաբաթ ալ-Նուսրա ահաբեկչական խմբավորումները։