Ռուսաստանի «բարեկամը»՝ ԱՄՆ պետքարտուղարի հավանական թեկնածու
ԱՄՆ նորընտիր նախագահ Դոնալդ Թրամփը պետքարտուղարի պաշտոնին նշանակելու է երկրի խոշորագույն նավթային ընկերություններից մեկի՝ «ExxonMobil»-ի ղեկավար Ռեքս Թիլերսոնին։ Այս մասին հաղորդում է ամերիկյան CNBC հեռուստաալիքը։
Դոնալդ Թրամփի երդմնակալության արարողությունը կկայանա 2017թ-ի հունվարի 20-ին։ Դրանից հետո նա պաշտոնապես Կոնգրեսին հաստատմանը կներկայացնի նոր կառավարության կազմը։
Ռեքս Թիլերսոնը 64 տարեկան է։ Ավարտել է Տեխասի համալսարանը։ Շուրջ 4 տասնամյակ աշխատել է «ExxonMobil» ընկերությունում, որտեղ սկզբում աշխատել է որպես հասարակ ինժեներ։ 1990-ականների վերջին ղեկավարել է ընկերության ծրագրերը Ռուսաստանում։
Թիլերսոնը 2006թ-ից գլխավորում է նավթային ընկերությունը։ 2012թ-ին նա «Ռոսնեվթի» հետ համաձայնագիր է կնքել Արկտիկայում հորատում կատարելու վերաբերյալ։ Սակայն 2014թ-ին «ExxonMobil» ընկերությունը ստիպված եղավ չեղարկել իր մասնակցությունն այդ նախագծում՝ Ռուսաստանի նկատմամբ Բարաք Օբամայի վարչակազմի կիրառած պատժամիջոցների պատճառով։ Հատկանշանական է, որ Թիլերսոնը հրապարակայնորեն կասկածի տակ էր դրել պատժամիջոցների արդյունավետությունը։
2013թ-ին ՌԴ նախագահ Վլադիմիր Պուտինը Ռեքս Թիլերսոնին պարգևատրել է բարեկամության շքանշանով, որը Ռուսաստանի Դաշնությունում օտաերկրացիներին շնորհվող բարձրագույն պետական պարգևներից է։