ԱՄՆ-ի նախկին նախագահներից միայն մեկն է ընդունել Թրամփի երդմնակալության արարողությանը ներկա գտնվելու հրավերը

ԱՄՆ-ի նախկին նախագահ Ջիմի Քարթերը կմասնակցի Դոնալդ Թրամփի երդմնակալության արարողությանը, գրում է Politico հանդեսը։

Աղբյուրի համաձայն՝ Քարթերն այս մասին հայտարարել է Ջորջիայի դպրոցներից մեկում, որտեղ ինքը դասավանդում է։

ԱՄՆ-ի մեկ այլ նախկին նախագահ Ջորջ Բուշ կրտսերի պաշտոնական ներկայացուցիչը հայտնում է, որ Միացյալ Նահանգների 43-րդ նախագահը չի հայտնի իր որոշման մասին մինչև նոր տարի։ Արդեն հայտնի է, որ նրա հայրը՝ Ջորջ Բուշ ավագը ներկա չի գտնվի Թրամփի երդմնակալության արարողությանը։ Վերջինիս ներկայացուցչի խոսքով՝ դա կապված է ԱՄՆ-ի 41-րդ նախագահի տարիքի հետ։ Այս տարի լրացավ նրա 92-ամյակը։

Քլինթոնները դեռ չեն պատասխանել հրավերին։ Բիլ Քլինթոնի պաշտոնական ներկայացուցիչը հրաժարվել է որևէ մեկնաբանություն տալ այս կապակցությամբ։

Ավանդույթի համաձայն՝ ԱՄՆ-ի նախկին բոլոր նախագահները հրավել են ստացել ներկա գտնվելու Դոնալդ Թրամփի երդմնակալության արարողությանը, որը կկայանա հունվարի 20-ին։ Աղբյուրը նշում է, որ 2009թ-ին Բարաք Օբամայի երդմնակալության արարողությանը ներկա են գտնվել Քարթերը, Քլինթոնը, ինչպես նաև՝ հայր և որդի Բուշերը։

Նշենք, որ նոյեմբերի 8-ին կայացած ԱՄՆ-ի նախագահական ընտրություններում հաղթանակ է տարել հանրապետական թեկնածու Դոնալդ Թրամփը՝ հավաքելով ընտրական կոլեգիայի անդամների 276 ձայն: