Ամանորի նախաշեմին հայ-ադրբեջանական բախումների հետևանքով մարդկային կորուստներ են գրանցվել
2016 թ. դեկտեմբերի 29-ի առավոտյան ՀՀ ՊՆ մամուլի քարտուղար Արծրուն Հովհաննիսյանը ֆեյսբուքյան իր էջում տեղադրած գրառման միջոցով տեղեկացրեց, որ Ադրբեջանի Զինված ուժերը դիվերսիոն գործողություններ են նախաձեռնել Հայաստանի Հանրապետության հյուսիս-արևելյան սահմանի՝ Տավուշի մարզի Չինարի գյուղի ուղղությամբ։
Մեր պաշտպանական գերատեսչության մամուլի քարտուղարի տեղեկացմամբ՝ ՀՀ զինված ուժերը մարտի են բռնվել հակառակորդի հետ, կիրառվել է դիպուկահարների և նռնականետերի կրակ։
Գրառումից ժամեր անց ՀՀ ՊՆ մամուլի քարտուղար Հովհաննիսյանը հայտնել էր, որ Հայաստանի Հանրապետության և Ադրբեջանի Հանրապետության զինված ուժերի միջև տեղի ունեցած մարտերի ընթացքում զոհվել է հայազգի 3 զինծառայող։
Ավելի ուշ հրապարակվեցին նաև զոհված զինծառայողների անունները՝ ավագ լեյտենանտ Շավարշ Մելիքսեթի Մելիքյան, շարքայիններ Էդգար Գրիգորի Նարայան և Էրիկ Գարիկի Աբովյան: Հովհաննիսյանն ավելացրել էր, որ հակառակորդը հետ է շպրտվել՝ կրելով մարդկային կորուստներ։
Կեսօրին արդեն Արծրուն Հովհաննիսյանը նոր գրառում կատարեց «Ֆեյսբուք» սոցիալական ցանցում, որի միջոցով տեղեկացնում էր, որ հայկական և ադրբեջանական ուժերի բախման հետևանքով թշնամին նահանջել է՝ կրելով 7 զոհ։