ԱՄՆ-ն չի մասնակցի սիրիական ճգնաժամի կարգավորման հարցով Աստանայում կայանալիք բանակցություններին

Ռուսաստանը, Իրանը, Թուրքիան և Սիրիան ԱՄՆ-ին չեն հրավիրել սիրիական հարցով բանակցություններին, որն, ամենայն հավանականությամբ, կկայանա հունվարի 23-ին։ Այս մասին հայտարարել է ԱՄՆ-ի պետքարտուղարության պաշտոնական ներկայացուցիչ Ջոն Քիրբին։

«Ճիշտ է՝ մենք ընդգրկված չենք բանակցություններում, սակայն պետքարտուղար Ջոն Քերին մտադիր է իր գործընկերների հետ լինել ակտիվ կապի մեջ», - հայտարարել է Քիրբին։

Վերջինիս խոսքով՝ Ջոն Քերին սիրիական ճգնաժամի հարցով Սերգեյ Լավրովի հետ խոսել է դեկտեմբերի 27-ին, իսկ Թուրքիայի արտգործնախարար Մևլութ Չավուշօղլուի հետ՝ դեկտեմբերի 20-ին։

Լրագրողի հարցին, թե ԱՄՆ-ն ընդունում է, որ զիջել է սիրիական ճգնաժամի  կարգավորման հարցում նախաձեռնությունը, Քիրբին պատասխանել է. «Համաձայն չեմ, որ մենք զիջել ենք ինչ-որ բան»։

Ավելի վաղ Ռուսաստանի նախագահ Վլադիմիր Պուտինը հայտարարել էր, որ պայմանավորվել է Թուրքիայի նախագահ Ռեջեփ Թայիփ Էրդողանի հետ սիրիական ճգնաժամի հարցով բանակցություններն Աստանայում շարունակելու առաջարկի շուրջ։ Ղազախստանի նախագահ Նուրսուլթան Նազարբաևն աջակցություն է հայտնել նախաձեռնությանը և հայտարարել է Աստանայում վերոնշյալ բանակցությունների համար հարթակ տրամադրելու իր պատրաստակամության մասին։ Սպասվում է, որ Աստանայում կողմերի հանդիպումը կկայանա հունվարի 23-ին։