Սպանվել է «Ջաբաթ ալ-Նուսրա» ահաբեկչական խմբավորման հրամանատարներից մեկը
ԱՄՆ-ի գլխավորած միջազգային կոալիցիայի օդուժը հարվածներ է հասցրել ահաբեկիչների՝ Սիրիայի հյուսիսային Իդլիբ քաղաքի մերձակայքում գտնվող հրամանատարական կետին։ Այս մասին հայտնում է «Ալ-Մանար» հեռուստաալիքը։
Աղբյուրի համաձայն՝ օդային հարվածի արդյունքում սպանվել է «Ջաբաթ Ֆատահ ալ-Շամ» (նախկին «Ջաբաթ ալ-Նուսրա») ահաբեկչական խմբավորման հրամանատարներից մեկը՝ Աբու Իբրահիմ աթ-Թունիսին։
Ըստ աղբյուրի տարածած տեղեկատվության՝ սպանվածը «Ալ Քաիդա» ահաբեկչական խմբավորման առաջնորդ Այման ալ-Զավահիրիի մտերիմներից էր։
Իդլիբը գտնվում է մայրաքաղաք Դամասկոսից 320կմ հեռավորության վրա։ 2015 թ. մարտից այն «Ջաբաթ ալ-Նուսրա» ահաբեկչական խմբավորման վերահսկողության տակ է։
«Ջաբաթ ալ-Նուսրան» համարվում է «Ալ Քաիդայի» Սիրիայի ճյուղը։ Նրա կազմում կռվում են հարյուրավոր օտարերկրյա վարձկաններ։