Ամերիկացիների ավելի քան 60%-ը դրական է գնահատել Օբամայի գործունեությունը
Ամերիկացիների մոտ երկու երրորդը դրական է գնահատել Բարաք Օբամայի նախագահական գործունեությունը։ Այս մասին են վկայում CBS հեռուստաընկերության անցկացրած սոցհարցման արդյունքները։
Սոցհարցմանը մասնակցած ամերիկացիների 62%-ը կարծում է, որ Օբաման հաջողությամբ է կատարել նախագահական պարտականությունները։ Ընդ որում՝ հարցվածների 55%-ը նրան համարել է «լավ նախագահ», իսկ 30%-ը՝ «շատ լավ նախագահ»։
CBS հեռուստաընկերության հաղորդմամբ՝ ամերիկացներն ամենից շատ գոհ են արտաքին քաղաքականության և տնտեսության ոլորտներում Օբամայի իրականացրած միջոցառումներից։ Նշվում է, որ այժմ նրա վարկանիշը նույնն է, ինչ նախագահ դառնալու ժամանակ։ 2009 թ. անցկացված հարցման մասնակիցների 60%-ը խոստովանել է, որ Օբաման լավ տպավորություն է թողնում իրենց վրա։
Ուսումնասիրության հեղինակները փաստում են, որ Օբամայի գործունեության վերաբերյալ հանրապետական կուսակցության համակիրների գնահատականը մեծապես տարբերվում է դեմոկրատական կուսակցության համակիրների գնահատականից։ Դեմոկրատների 90%-ից ավելին դրական է գնահատում Օբամայի նախագահական գործունեությունը։ Հանրապետականների շրջանում այդպիսի կարծիք ունի հարցվածների մոտ մեկ երրորդը։
Հեռուստաընկերությունը նշում է, որ Օբաման նախագահական լիազորություններն ավարտում է բավական բարձր վարկանիշով։ 1981 թվականից ի վեր ավելի բարձր ցուցանիշ են գրանցել միայն Բիլ Քլինթոնը (68%) և Ռոնալդ Ռեյգանը (68%)։