Աստանայում մեկնարկել են սիրիական հակամարտության կարգավորման հարցով բանակցությունները

Այսօր՝ հունվարի 23-ի առավոտյան Ղազախստանի մայրաքաղաքում մեկնարկել են սիրիական ճգնաժամի կարգավորման հարցով բանակցությունները։ Հանդիպումն անցկացվում է Rixos հյուրանոցում. գրում է ՏԱՍՍ-ը։

Հանդիպման գլխավոր հարցը, որը պետք է քննարկեն հավաքված պատվիրակությունների անդամները, հրադադարի ռեժիմի պահպանումն է և քաղաքական բանակցային գործընթացի կազմակերպումը Ժնևում փետրվարի 8-ին կայանալիք խորհրդակցությունների նախաշեմին։

Բանակցություններին մասնակցում է 7 պատվիրակություն. Սիրիայի իշխանության և ընդդիմության ներկայացուցիչները, դեկտեմբերի 29-ի հրադադարի համաձայնագրի երաշխավոր երկրների՝ Իրանի, Ռուսաստանի և Թուրքիայի պատվիրակությունները, ՄԱԿ-ի խումբը՝ Սիրիայի հարցով հատուկ բանագնաց Ստեֆան դե Միստուրայի գլխավորությամբ և Ղազախստանում ԱՄՆ-ի դեսպան Ջորջ Քրոլը՝ որպես դիտորդ։

Ռուսաստանի պատվիրակությունը գլխավորում է սիրիական հակամարտության կարգավորման հարցով ՌԴ նախագահի հատուկ ներկայացուցիչ Ալեքսանդր Լավրենտևը։ Իրանի պատվիրակության ղեկավարը արտգործնախարարի տեղակալ Հոսեյն Ջաբերի Անսարին է, իսկ Թուրքիայինը՝ արտգորնախարարի խորհրդականի՝ Մերձավոր Արևելքի և Աֆրիկայի հարցերով տեղակալ Սեդաթ Օնալը։ Սիրիայի իշխանության պատվիրակությունը ղեկավարում է ՄԱԿ-ում Սիրիայի մշտական ներկայացուցիչ Բաշար Ջաաֆարին։ Ընդդիմությունը ներկայացնում են Սիրիայի հյուսիսում, կենտրոնում, մասամբ նաև հարավում գործող զինված խմբավորումները։ Վերջիններիս հիմնական բանակցողը «Ջեյշ ալ-Իսլամ» խմբավորման ներկայացուցիչ Մուհամմեդ Ալյուշն է։

Նախատեսված է, որ բանակցությունները կավարտվեն հունվարի 24-ին՝ տեղի ժամանակով ժամը 13:00-ին (Երևանի ժամանակով 11:00-ին – խմբ. ), իսկ ամփոփիչ մամուլի ասուլիսը կսկսվի14:00-ին (Երևանի ժամանակով 12:00-ին – խմբ.)։ Հանդիպման կազմակերպիչներն ու մասնակիցները չեն բացառում, որ, անհրաժեշտության դեպքում, բանակցությունները կարող են նախատեսվածից երկար տևել։