Թուրքիայում ձերբակալված ռուս կինը մեղադրվում է դեսպան Անդրեյ Կարլովի սպանության հետ կապ ունենալու մեջ
![](https://www.noror.am/sites/default/files/styles/header_image/public/header-images/karlov_0.jpg?itok=I6-uyNbD)
Թուրքիայի ոստիկանությունը ձերբակալել է ռուս Եկատերինա Բ.-ին, որը մեղադրվում է Թուրքիայում ՌԴ դեսպան Անդրեյ Կարլովի սպանության հետ առնչություն ունենալու մեջ։ Այս մասին գրում է ՏԱՍՍ-ը՝ հղում կատարելով թուրքական A Haber լրատվականին։
Նշվում է, որ նախորդ տարվա նոյեմբերին վերոնշյալ կինը զանգահարել է մարդասպան Մևլութ Մերթ Ալթընթաշին, ինչպես նաև Անկարայի ռուսական մշակույթի կենտրոն։ Հարցաքննության ժամանակ կինը խոստովանել է, որ կապվել է Ալթընթաշի հետ հիմնականում նամակագրության միջոցով։
Թուրքական Sabah թերթի հաղորդած տվյալների համաձայն՝ 33-ամյա Եկատերինան Անկարայում զբաղվում էր կավատությամբ։
Ներկա պահին կինը դատարանի որոշմամբ գտնվում է Անկարայի բանտերից մեկում՝ հատուկ հսկողության տակ։
Նշենք, որ նախորդ տարվա դեկտեմբերի 19-ին Անկարայի Ժամանակակից արվեստների կենտրոնում ցուցահանդեսի ժամանակ սպանվել էր Թուրքիայում Ռուսաստանի դեսպան Անդրեյ Կարլովը։ Մարդասպանը, որը ոչնչացվել էր հատուկ գործողության արդյունքում, 22-ամյա Մևլութ Մերթ Ալթընթաշն էր։ Նա Իզմիրի ոստիկանական դպրոցի շրջանավարտ էր և 2.5 տարի աշխատել էր Անկարայի ոստիկանությունում։