Սիրիական ընդդիմությունը հրաժարվել է մասնակցել Աստանայի հանդիպմանը

Ղազախստանի մայրաքաղաք Աստանայում ընթացող սիրիական ճգնաժամի կարգավորման հարցով հանդիպման մասնակիցների լիագումար նիստը կկայանա այսօր՝ մարտի 15-ին։ ՏԱՍՍ-ի փոխանցմամբ՝ նիստին հրաժարվել է մասնակցել սիրիական ընդդիմության պատվիրակությունը։

Ընդդիմության ներկայացուցիչները որպես պատճառաբանություն նշում են հրադադարի ռեժիմի խախտումները։ Աղբյուրը, սակայն, ամբողջովին չի բացառում ընդդիմության մասնակցությունը բանակցություններին։

Աստանայի հանդիպմանը որպես երաշխավոր երկրներ մասնակցում են Ռուսաստանի, Իրանի և Թուրքիայի պատվիրակությունները։ Ներկա են նաև ՄԱԿ-ում Սիրիայի մշտական ներկայացուցիչ Բաշար Ջաաֆարին, Ղազախստանում ԱՄՆ դեսպան Ջորջ Քրոլը և Հորդանանի պատվիրակությունը։

Մարտի 14-ին հանդիպման մասնակիցներն անցկացրել են նախնական խորհրդակցությունները։ Բանակցությունների փուլը կեզրափակվի Ռուսաստանի, Իրանի և Թուրքիայի պատվիրակությունների միջև հանդիպումով։

ՄԱԿ-ում Սիրիայի մշտական ներկայացուցիչ Բաշար Ջաաֆարին բանակցություններին ընդդիմության բացակայության համար մեղադրել է թուրքական կողմին։

«Սա կրկին փաստում է, որ ընդդիմությունը կառավարելի է։ Թուրքիան, որպես երաշխավոր երկիր պատասխանատվություն է կրում այս ամենի համար։ Պետք է հարցնել Թուրքիային, թե ինչու ընդդիմությունը ներկա չէ», - ասել է Ջաաֆարին։