Եվրամիության կողմից Ռուսաստանի նկատմամբ պատժամիջոցների կիրառումն անմտություն է. Ֆրանսիայի նախագահի թեկնածու
Ռուսաստանի նկատմամբ Եվրամիության կիրառած պատժամիջոցները շանտաժի և սպառնալիքի հիմար դիվանագիտության արդյունք են։ Այս մասին այսօր՝ մարտի 24-ին, Ռուսաստանի Պետդումայի արտաքին հարաբերությունների հանձնաժողովում ունեցած ելույթի ժամանակ հայտարարել է Ֆրանսիայի «Ազգային ճակատ» կուսակցության առաջնորդ, Ֆրանսիայի նախագահի թեկնածու Մարին Լե Պենը։
«Ինչ վերաբերում է պատժամիջոցներին և դրանց կիրառման վերաբերյալ իմ դիրքորոշմանը, դուք գիտեք, որ ես միշտ էլ դեմ եմ եղել նման քաղաքականությանը։ Կարծում եմ, որ դա անմտություն», - ասել է Լե Պենը։ Նրա խոսքով՝ պատժամիջոցների կիրառումն օգնել է ԵՄ-ում նման երևույթներին դեմ հանդես եկող ընդդիմության ձևավորմանը։
«Մեք չենք հավատում ոչ շանտաժի, ոչ սպառնալիքի և ոչ էլ պատժամիջոցների քաղաքականությանը, որը վերջին շրջանում Եվրամիությունը կիրառում է ոչ միայն Ռուսաստանի, այլ նաև իր իսկ անդամների նկատմամբ», - հայտարարել է ֆրանսիացի քաղաքական գործիչը։
Նշենք, որ Մարին Լե Պենը Մոսկվա է այցելել Պետդումայի արտաքին հարաբերոթյունների հանձնաժողովի հրավերով։
Հիշեցնենք, որ Ֆրանսիայում նախագահական ընտրությունները կանցկացվեն երկու փուլով։ Առաջին փուլը կկայանա ապրիլի 23-ին, իսկ երկրորդը՝ մայիսի 7-ին։