Թուրքիան պատրաստ է ՌԴ քաղաքացիներին ընդունել ներքին անձնագրերով

Թուրքիան պատաստ է առարկայական քննարկում սկսել Ռուսաստանի հետ ներքին անձնագրերով փոխադարձ այցելությունների վերաբերյալ։ Այս մասին Թուրքիայի արտգոծնախարար Մևլութ Չավուշօղլուն խոսել է Անթալիայում բնակվող ռուսների հետ հանդիպման ժամանակ. հայտնում է NTV հեռուստաալիքը։

«Դեռ այն տխուր միջադեպից առաջ (2015 թ. նոյեմբերին ռուսական Սու-24 ռազմական ինքնաթիռի խոցումը Թուրքիայի ռազմաօդային ուժերի կողմից) այդ թեմայով լուրջ բանակցություններ են ընթացել։ Հիմա, երբ մեր հարաբերությունները կարգավորվել են, մենք կարող ենք շարունակել այդ բանակցությունները», - ասել է Չավուշօղլուն։

Նրա խոսքով՝ շուտով քննարկումներ կսկսվեն ռուսաստանցիներին ներքին անձնագրերով Թուրքիա ընդունելու հարցով։

Թուրքիան փորձում է հնարավորինս հեշտացնել երկիր մուտք գործելու պայմանները։ Մասնավորապես՝ ներքին անձնագրերով Թուրքիա կարող են մուտք գործել Վրաստանի քաղաքացիները։ Այս տարվա մարտի կեսին նման համաձայնագիր է կնքվել նաև Ուկրաինայի հետ։

Հիշեցնենք, որ ռուսական ռազմական ինքնաթիռի կործանումից հետո Ռուսաստանը չեղարկել էր Թուրքիայի հետ առանց վիզայի մուտքի ռեժիմը։