Իսրայելը կոչ է անում չայցելել Թուրքիա, Եգիպտոս և Հորդանան

Իսրայելի ահաբեկչության դեմ պայքարի բյուրոն զգուշացնում է ապրիլի 10-ին Փեսախը (հրեական զատիկ) նշել պատրաստվող իսրայելցի զբոսաշրջիկներին զերծ մնալ ԻՊ-ի վերահսկողության տակ գտնվող տարածքներին հարող պետություններ՝ Թուրքիա, Հորդանան և Եգիպտոս (հատկապես Սինայի թերակղզի) այցելելուց։ Այս մասին գրում է posta լրատվականը։

Ահաբեկչության դեմ պայքարի իսրայելական բյուրոն սահմանել է նշված վայրերում ահաբկչության հավանականության 3 աստիճան։ Ամենավտանգավորը համարվում է Սինայի թերակղզին։ Նշվում է, որ այստեղ առկա է ահաբեկչության կոնկրետ սպառնալիք։

Թուրքիան հայտնվել է ահաբեկչության հավանականությունը ցույց տվող սանդղակի երկրորդ հորիզոնականում։ Թուրքիայում գտնվող Իսրայելի քաղաքացիներին կոչ է արվում անհապաղ հեռանալ, իսկ մեկնել ցանկացողներին՝ հետաձգել կամ ընդհանրապես չեղարկել այցերը։

Եգիպտոսի մյուս շրջանները և Հորդանանը համարվում են քիչ վտանգավոր, սակայն ահաբեկչության դեմ պայքարի իսրայելական բյուրոն խորհուրդ է տալիս այս երկրներ նույնպես չայցելել։