ԱՄՆ-ն ՆԱՏՕ-ի անդամներից պահանջում է ավելացնել պաշտպանական ծախսերը

ԱՄՆ պետքարտուղար Ռեքս Թիլերսոնը հորդորել է ՆԱՏՕ-ի դաշնակից պետություններին ավելացնել պաշտպանական ծախսերը կամ երկու ամսվա ընթացքում բյուջետային նոր ծրագրեր մշակել։ Այս մասին տեղեկացնում է ամերիկյան USA Today պարբերականը։

ՆԱՏՕ-ի հետ սկզբնական բանակցությունների ընթացքում Թիլերսոնը դժգոհություն էր հայտնում, որ ԱՄՆ-ն ավելի շատ է ծախսում պաշտպանության վրա, քան դաշնակից մյուս երկրները։ Նա նշել էր նաև, որ սպասում է նախագահ Թրամփի և Դաշինքի անդամ մյուս երկրների առաջնորդների հանդիպմանը, որը կկայանա մայիսի 25-ին։

2014 թ. ՆԱՏՕ-ի դաշնակից երկրների ղեկավարները խոստացել էին դադարեցնել պաշտպանական ծախսերի կրճատումը և 2%-ով ավելացնել ՀՆԱ-ի ծավալները: Ներկայումս միայն չորս երկիր է հասել այդ արդյունքին՝ Մեծ Բրիտանիան, Էստոնիան, Հունաստանը և Լեհաստանը:

«Մեր նպատակն է համաձայնության գալ ղեկավարների մայիսյան համդիպմանը, որ մինչև տարվա վերջ դաշնակիցները կամ պետք է կատարեն գլխավոր պահանջները, կամ՝ մշակեն պարտավորությունների կատարման հստակ ծրագրեր», - նախարարներին հետ հանդիպմանը նշել է Թիլերսոնն՝ ավելացնելով, որ Դաշինքի անդամներից յուրաքանչյուրի դեմ ուղղված հարձակում կամ որևէ սպառնալիք ուղղված է բոլորի դեմ։

Նախընտրական քարոզարշավի ընթացքում Թրամփը բազմիցս նշել է, որ չի պատրաստվում պաշտպանել այն դաշնակիցներին, որոնք չեն կատարում իրենց պարտավորությունները։

Պարբերականը գրում է, որ նախորդ տարի Գերմանիան պաշտպանության վրա ծախսել է իր ընդհանուր բյուջեի 1.19%-ը։ Անդրադառնալով պաշտպանական ծախսերի ավելացման վերաբերյալ ԱՄՆ-ի պահանջներին՝ Գերմանիայի արտաքին գործերի նախարար Սիգմար Գաբրիելը անհավանական է համարել ծախսերը 37 միլիարդ դոլլարից 70 միլիարդի հասցնելը։ Նրա խոսքով՝ դա կնշանակի, որ Գերմանիան ավելի շատ է ծախսում պաշտպանության վրա քան Ռուսաստանը։ Գերմանիայի արտաքին գերատեսչության ղեկավարը կարևորել է նաև իրենց դերը փախստականների ընդունման հարցում։ Նա նշել է, որ Գերմանիան մեծ գումարներ է ծախսում ռազմական միջամտության ձախողման պատճառով իրենց երկիր ներգաղթած փախստականների վրա։

Հիշեցնենք, որ մարտի 18-ին Սպիտակ տանը կայացած հանդիպմանը Դոնալդ Թրամփն Անգելա Մերկելին էր ներկայացրել մոտ 375 միլիարդ դոլարի վճարման հաշիվ՝ ՆԱՏՕ-ի ծառայությունների համար։