ՆԱՏՕ-ն սպառնալիք է համարում Կալինինգրադում «Իսկանդեր»-ի տեղակայումը

ՆԱՏՕ-ի անդամ երկրները սպառնալիք են համարում ռուսական «Իսկանդեր» զենիթահրթիռային համակարգի տեղակայումը Կալինինգրադի շրջանում։ Այս մասին «Коммерсант»-ին տված հարցազրույցում հայտարարել է ՆԱՏՕ-ի գլխավոր քարտուղարի տեղակալ Ռոուզ Գետտեմյուլլերը։

«Ոչ ոք չի վիճում, որ Կալինինգրադը Ռուսաստանի տարածք է, սակայն «Իսկանդեր» համակարգի տեղակայումն այնտեղ խոսում է ռազմականացման միտումների և օդային տարածքի վերահսկողության մեծացման փորձի մասին։ ՆԱՏՕ-ի անդամ երկրները, որոնք սահմանակցում են Ռուսաստանին, դա համարում են սպառնալիք իրենց անվտանգությանը», - հայտարարել է ՆԱՏՕ-ի ներկայացուցիչը։

Ռուսաստանի Դաշնության արտաքին գործերի նախարարության համաեվրոպական համագործակցության վարչության պետ Անդրեյ Կելինն, իր հերթին, հայտարարել էր, որ Ռուսաստանը չի պատրաստվում հաշվետվություն տալ ՆԱՏՕ-ին Կալինինգրադի շրջան «Իսկանդեր» համակարգ տեղակայելիս։

Ավելի վաղ ՌԴ պաշտպանության նախարարությունը հաստատել էր ԶԼՄ-ներում շրջանառվող լուրերն այն մասին, որ Ռուսաստանը «Իսկանդեր» համակերգեր է  տեղակայում Կալինինգրադի շրջանում։ ՌԴ ՊՆ ներկայացուցիչ Իգոր Կոնաշենկովի խոսքով՝ ռուսական հրթիռային ուժերը վերապատրաստում են անցնում Կալինինգրադում, և ոչ ոք չի էլ փորձել գաղտնի պահել «Իսկանդեր»-ի՝ Կալինինգրադ տեղափոխումը։

Մերձբալթյան երկրների և Լեհաստանի կողմից բազմիցս հայտարարություններ են հնչել, որ Ռուսաստանը այդպիսով սպառնում է իրենց անվտանգությանը։

Ռուսաստանի արտաքին գործերի նախարար Սերգեյ Լավրովն այս կապակցությամբ հայտարարել է, որ ՆԱՏՕ-ում լավ գիտեն, որ Ռուսաստանը որևէ մեկի վրա հարձակվելու մտադրություններ չունի։ Լավրովի խոսքով՝ Դաշինքն, առիթից օգտվելով, Ռուսաստանի սահմանների մոտ տեղակայում է ավելի շատ ռազմական տեխնիկա։