Ժարեդ Քուշներն այցելել է Իրաք
![](https://www.noror.am/sites/default/files/styles/header_image/public/header-images/jared.jpg?itok=GrWI5vlA)
ԱՄՆ նախագահ Դոլանդ Թրամփի գլխավոր խորհրդական Ժարեդ Քուշները, որը նաև նախագահի աղջկա ամուսինն է, Զինված ուժերի շտաբի պետերի միացյալ հանձնաժողովի նախագահ Ժոզեֆ Դենֆորդի առաջարկով այցելել է Իրաք։ Այս մասին տեղեկացնում է CNN-ը։
Ռոյթերս լրատվականի փոխանցմամբ՝ Քուշները ցանկացել է տեղում անձամբ տեսնել իրավիճակը և աջակցություն հայտնել Իրաքի իշխանություններին։ Վերջին ամիսներին հենց նա է պատասխանատու Թրամփի վարչակազմի՝ այլ պետությունների ղեկավարների հետ կապերի հարցում։
Ներկայում ԱՄՆ-ի գլխավորած միջազգային կոալիցիան Իրաքի տարածքում հարվածներ է հասցնում Իսլամական պետության ահաբեկիչների դիրքերին։ Նախորդ տարվա հոկտեմբերի 17-ին սկսվել էր Իրաքում ԻՊ կենտրոն համարվող Մոսուլի ազատագրման գործողությունը։ Արդեն այս տարվա հունվարի 18-ին Իրաքի Զինված ուժերին հաջողվել էր ազատագրել քաղաքի արևելյան մասը, իսկ փետրվարի վերջին ազատագրվել էր Մոսուլի օդանավակայանը և քաղաքի հարավարևելքում գտնվող Ալ Գազլյանի ռազմաբազան։
Ռազմական գործողություններին բացի իրաքյան բանակի զինվորներից մասնակցում են նաև շիա աշխարհազորայինները և քրդական «Փեշմերգա» զորամիավորումը։ Նրանց օգնում են ԱՄՆ-ի գլխավորած միջազգային կոալիցիայի և Իրաքի ռազմաօդային ուժերը։