Թուրքիան բռնազավթել է մեր տարածքը. Ռուսաստանում Սիրիայի դեսպան

Թուրքիան «Եփրատի վահան» գործողության ավարտի մասին հայտարարելուց հետո դեռ դուրս չի բերել իր զորքերը Սիրիայի տարածքից, և Դամասկոսը դա համարում է օկուպացիա։ Այս մասին հայտարարել է Ռուսաստանում Սիրիայի դեսպան Ռիադ Հադդադը։

«Թուրքիան դեռ դուրս չի բերել իր զորքերը, և մենք նրանց համարում ենք զավթիչներ։ Մարտի 29-ին Թուրքիան հայտարարեց «Եփրատի վահան» գործողության հաջող ավարտի մասին, սակայն զորքերի դուրսբերման գործընթացը չի էլ սկսվել։ Սա համարվում է մեր տարածքների բռնազավթում», - ասել է Սիրիայի դեսպանը։

Նշենք, որ նախորդ տարվա օգոստոսի 24-ից Թուրքիայի Զինված ուժերը «Սիրիայի ազատ բանակի» օժանդակությամբ իրականացնում էին «Եփրատի վահան» ռազմական գործողությունը, որի նպատակն էր Սիրիայի հյուսիսային Ջերաբլուս և Էլ Բաբ քաղաքներն ազատագրել ԻՊ գրոհայիններից: Այս գործողությամբ Թուրքիայի իշխանությունները ցանկանում էին անվտանգության գոտի ստեղծել Սիրիայի հյուսիսային շրջաններում:

Մարտի 29-ին Թուրքիայի վարչապետ Բինալի Յըդըրըմը հայտարարել էր «Եփրատի վահան» գործողության ավարտի մասին՝ ավելացնելով, որ իրենց երկրին սպառնացող որևէ վտանգի դեպքում հնարավոր է սկսեն ռազմական նոր գործողություն։