Սանկտ Պետերբուրգի ահաբեկչության զոհերի և վիրավորների ընտանիքները դրամական փոխհատուցում կստանան
Ռուսաստանի վարչապետ Դմիտրի Մեդվեդևը կարգադրել է դրամական օգնություն հատկացնել ապրիլի 3-ին Սանկտ Պետերբուրգում տեղի ունեցած ահաբեկչության զոհերի և տուժածների ընտանիքներին: Այս մասին կարդում ենք ՌԴ կառավարության պաշտոնական կայքում:
Կարգադրության համաձայն՝ Պետերբուրգի իշխանություններին մինչև 50 միլիոն ռուբլի կհատկացվի Ռուսաստանի պահուստային միջոցներից՝ միանվագ նպաստներ վճարելու համար:
Զոհվածի ընտանիքի յուրաքանչյուր անդամի կտրվի 1 միլիոն ռուբլու չափով դրամական օգնություն: Ծանր կամ միջին կարգի վնասվածք ստացած քաղաքացիները կստանան 400 հազարական, իսկ թեթև վնասվածք ստացած քաղաքացիները՝ 200 հազարական ռուբլի դրամական օգնություն:
Հիշեցնենք, որ ապրիլի 3-ին Սանկտ Պետերբուրգի մետրոյում տեղի ունեցած պայթյունի հետևանքով 14 մարդ էր զոհվել, 50-ը՝ ստացել էր տարբեր աստիճանի մարմնական վնասվածքներ:
Հարուցվել է քրեական գործ՝ «ահաբեկչական գործողություն» կատարելու հոդվածով: ՌԴ քննչական կոմիտեն հաստատել է, որ պայթյունն իրականացրել է Ռուսաստանի քաղաքացի, ազգությամբ ղրղզ Ակբարժոն Ջալիլովը։